F Chandrapur Missing News: सोनापूर येथील दोन चिमुकलींसह वडील रहस्यमरीत्या बेपत्ता, शोधकार्यासाठी परिवाराकडून मदतीची हाक | My Khabar24

M S Official

08-01-2025

Chandrapur Missing News: सोनापूर येथील दोन चिमुकलींसह वडील रहस्यमरीत्या बेपत्ता, शोधकार्यासाठी परिवाराकडून मदतीची हाक

Chandrapur Missing News: सोनापूर गावातील दोन चिमुकलींसह 31 डिसेंबरपासून वडील बेपत्ता आहेत. त्यामुळे कुटुंबीयांसह गावामध्ये चिंतेचे वातावरण आहे. या संदर्भात कुटुंबीयांनी पोलिस स्टेशनमध्ये तक्रार दाखल केली. वडील नशेमध्ये तर्रर्र राहत असल्याने आपल्या चिमुकलींचे काय हाल होत असतील, ती कुठे असतील, याबाबत मुलीच्या आईसह आजी, आजोबांची काळजी अधिकच वाढली आहे. दरम्यान, पोलिसांनी शोधकार्य सुरू केले आहे. मंगेश भांडेकर असे वडिलाचे, तर शिवण्या (8) व यशिका (5) वर्ष अशी चिमुकलींची नावे आहेत.

मंगेश भांडेकर याला दारूचे व्यसन असून पत्नी, आई, वडील यांना नशेत अनेकदा मारहाण करीत असल्याची गावात चर्चा आहे. त्यामुळे मागील एक वर्षापासून पत्नी आशा भांडेकर ही चामोर्शी तालुक्यातील दोटकुली येथे माहेरी लहान मुलींसह राहत होती. मोठ्या मुलीची शाळा असल्याने ती आजी-आजोबाकडे सोनापूर येथे राहत होती. आशा रोवणीच्या कामाला तेलंगणा येथे गेली असता, मंगेश भांडेकर लहान मुलीला, तसेच सोनापूर येथील मुलीला घेऊन 31 डिसेंबरपासून बेपत्ता झाला आहे.

तो दारूच्या नशेत नेहमी राहत असल्याने व कुठे आहे, याची माहिती कुणालाच नसल्याने कुटुंबीय चिंतेत पडले आहेत. आजी- आजोबांनी 2 जानेवारी रोजी पोलिस स्टेशनला तक्रार दिली, तर आई आशा भांडेकर हिने उपविभागीय पोलिस अधिकाऱ्यांच्या कार्यालयात तक्रार दिली. त्यानंतर, शोधकार्य सुरू केले आहे. बाल संरक्षण विभागाची टीमही त्यांच्या शोधकार्यात लागली आहे, परंतु अद्यापही तिघांचाही पत्ता लागला नसल्याने कुटुंबीयांची चिंता अधिकच वाढली आहे.

ग्रामपंचायतचे उपसरपंच मुकेश भुरसे यांनी मंगळवारी (दि. 7) मंगेश भांडेकर याचे वडील बंडू भांडेकर व पत्नी आशा यांना घेऊन पोलिस स्टेशन गाठले, तसेच तपास करण्याची मागणी केली. यावेळी ठाणेदार पुल्लुरवार यांनी पोलिस यंत्रणेमार्फत शोधमोहीम सुरू असल्याचे सांगितले.