Gadchiroli News: देवराव होळींना धक्का ! गडचिरोलीतून मिलिंद नरोटेंना उमेदवारी, या कारणांमुळे कापण्यात आली देवराव होळी यांची उमेदवारी ?

Gadchiroli News: गडचिरोली येथील मतदारसंघात भाजपने धक्कातंत्राचा वापर करीत विद्यमान आमदार डॉ. देवराव होळी यांची उमेदवारी कापली. त्यांच्याऐवजी भाजप आदिवासी मोर्चाचे जिल्हाध्यक्ष व भाजपचे जिल्हा उपाध्यक्ष डॉ. मिलिंद नरोटे Dr. Milind Narote यांच्या रूपाने महायुतीने नवा चेहरा मैदानात उतरविला आहे. आता डॉ. नरोटे यांच्या समोर महाविकास आघाडीकडून आखाड्यात कोण येणार, याचीच प्रतीक्षा आहे. ऑक्टोबरला सायंकाळी डॉ. नरोटे यांच्या Dr. Milind Narote उमेदवारीची घोषणा होताच भाजपच्या एका गटात आनंदोत्सव, तर डॉ. होळी समर्थकांत अस्वस्थता पाहावयास मिळाली.

भाजपने 20 ऑक्टोबरला 19 उमेदवारांची पहिली यादी जाहीर केली होती. यात आरमोरीतून आमदार कृष्णा गजबे यांना तिसऱ्यांदा उमेदवारी जाहीर केली, पण गडचिरोलीचा निर्णय राखून ठेवला होता. त्यामुळे आमदार डॉ. देवराव होळी समर्थकांची धाकधूक वाढली होती. अखेर भाजपने 'हरियाणा पॅटर्न'चा अवलंब करीत आमदार होळी यांना बाजूला सारून डॉ. मिलिंद नरोटे Dr. Milind Narote यांना उमेदवारी जाहीर केली. 

त्यामुळे डॉ. होळी यांना हा मोठा धक्का मानला जात आहे. उमेदवारीची घोषणा झाल्यानंतर माजी खासदार अशोक नेते यांच्या जनसंपर्क कार्यालयाबाहेर फटाक्यांची आतषबाजी करून जल्लोष करण्यात आला. यावेळी अशोक नेते, डॉ. मिलिंद नरोटे, भाजप महिला मोर्चा जिल्हाध्यक्षा गीता हिंगे, भाजप सहकार मोर्चाचे जिल्हाध्यक्ष आशिष पिपरे, भाजप ओबीसी मोर्चाचे जिल्हाध्यक्ष अनिल पोहनकर, भाजयुमो जिल्हाध्यक्ष अनिल तिडके, आदी उपस्थित होते.

असा आहे डॉ. नरोटे यांचा प्रवास.

डॉ. मिलिंद नरोटे हे मूळचे रेखेगाव (ता. चामोर्शी) येथील रहिवासी आहेत. कुठलीही राजकीय पार्श्वभूमी नसलेले मिलिंद नरोटे हे वैद्यकीय शिक्षण पूर्ण केल्यानंतर 2013 मध्ये धानोरा ग्रामीण रुग्णालयात वैद्यकीय अधिकारी म्हणून रुजू झाले.2018 मध्ये गडचिरोलीत स्वतःचे हॉस्पिटल सुरु केले. 2021 मध्ये त्यांनी स्पंदन फाऊंडेशनची स्थापना केली व समाजकारणात आले. राष्ट्रीय स्वयंसेवक संघातून ते भाजपशी जोडले गेले.

देवराव होळी यांची उमेदवारी कापण्यामागची ही आहेत कारणे?

•  डॉ. देवराव होळी यांचा आदिवासी विद्यार्थी संघ, काँग्रेस व नंतर भाजप असा
  प्रवास राहिला. 2024 मध्ये मोदी लाटेवर स्वार होत त्यांनी विधानसभा गाठली. 2019 मध्येही त्यांनी विजय मिळविला. मात्र, अलीकडे उथळ वक्तव्ये व पक्षविरोधी कृतींमुळे ते सतत चर्चेत होते. गडचिरोलीचा विकास झाला, निधी नको.... या विधानसभेतील अजब मागणीवरून त्यांच्यावर टीका झाली.

• तुझ्या एका मताने मला फरक पडतो का, अशा शब्दांत आदिवासी तरुणास सुनावल्याची त्यांची ऑडिओ क्लिप व्हायरल झाली होती. मेक इन गडचिरोली हा त्यांचा ड्रीम प्रोजेक्टही वादात सापडला. संपूर्ण लोकसभा क्षेत्रात पोस्टरबाजी करून त्यांनी माजी खासदार अशोक नेते यांचा रोष ओढवून घेतला. पुढे भाजपमध्ये गटातटाचे राजकारण सुरु झाले. यातून डॉ. होळी यांच्याबद्दल पक्षाकडे नकारात्मक अहवाल गेला.