सुपर फास्ट बातमी

19-10-2024

बँक व्यवस्थापकाने केले युवतीचे शारीरिक शोषण

आरोपीला पीसीआर : मुलचेरातील प्रकार

मुलचेरा तालुक्याच्या लभानतांडा येथील २० वर्षीय युवतीचे लैंगिक शोषण करणाऱ्या धानोरा येथील बँक व्यवस्थापकावर मुलचेरा पोलिसांनी गुन्हा नोंदविला. त्यानंतर सदर आरोपीला न्यायालयात हजर केले असता न्यायालयाने तीन दिवसांची पोलिस कोठडी सुनावली.

विजय सदानंद राठीपिटने (३६, रामटेक, जिल्हा नागपूर), असे आरोपीचे नाव आहे. विजय राठीपिटने हा २०२३ रोजी मुलचेरा येथील विदर्भ कोकण बँकेत व्यवस्थापकपदी कार्यरत होता. तेव्हा लभाणतांडा येथील युवती ही बँकेत ये जा करायची. दरम्यान, दोघांचाही परिचय झाला. 'तुला शिक्षणासाठी मदत करतो व अधिकारी बनवतो व लग्न करतो' असे आमिष आरोपी विजय राठीपिटने याने युवतीला दिले. त्यानंतर वेळोवेळी शारीरिक संबंध ठेवले. मात्र, मुलीने जेव्हा लग्नासाठी आग्रह धरला तेव्हा 'तू वाईट प्रवृत्तीची मुलगी असून माझ्याकडून पैसे घेतलेले आहेत' अशी दमदाटी देत लग्नास नकार दिला. झालेल्या मानसिक त्रासामुळे मुलीने मुलचेरा पोलिस स्टेशनमध्ये १५ ऑक्टोबरला शारीरिक शोषणाची तक्रार नोंदवली. सदर तक्रारीवरून आरोपीला अटक करून गुन्हा नोंद करीत न्यायालयात हजर केले असता १८ ऑक्टोबरपर्यंत पोलिस कोठडी सुनावण्यात आली होती. या प्रकरणाचा पुढील तपास पोलिस निरीक्षक महेश विधाते व पीएसआय ऋतुजा खाते करत आहेत.