युवाक्रांती समाचार

10-01-2024

लहर की बरखा-१३..! लेखक:-पुरुषोत्तम बैसकार, मोझरकर

लूटो मजा गुरुनाम की, ऐसी बखत ना आयगी ।

यह मालमत्ता यार इकदिन, खाकमें मिलजायगी ।।

अपने भलाईके लिये, सत्संग साधो जन्मभर ।

तो माल क्या संसार है?, कूदे चढेंगे ख्यालपर ।।

श्री गुरुदेवाने दिलेला नाममंत्राचा जप करून जीवाचा उद्धार करु शकता. गुरुदेवाच्या नामाचा महिमा अनंत आहे. गुरुदेवाने दिलेल्या नामात जेवढा आनंद आहे, तो आनंद आपल्या मालमत्तेत, संपत्ती मध्ये नाही. कारण ही मालमत्ता एक दिवस आपल्याला सोडून जावे लागेल. राष्ट्रसंत म्हणतात.

जो खासकी पहिचान दे ।
वैसे गुरुपर जान दे ।।

जे सत् आहे म्हणजेच नित्य आहे त्याच्याशी संग म्हणजे सत्संग. आपल्या भल्यासाठी सत्संग साधणे गरजेचे आहे. सर्व प्राणीमात्राची धडपड ही सुखासाठी चाललेली असते. विषयात सुख नाही असे संत सांगतात. सत्संग एक क्षण मिळाला तरी आमचा जीव पावन होईल असे राष्ट्रसंत म्हणतात.

सत्संग जरी क्षण एक मिळे ।
जीव पावन होईल हा अमुचा ।।

रामाची भक्ती केली जाते पण खरा आत्माराम जेथे सांगितला जातो किंवा ज्याची ओळख करुन दिली जाते, ते ठिकाण सत्संग होय. सत्संग म्हणजे चांगला सहवास. सत् पुरुषाचे समागमाने मनोवृत्ती संस्कारित होते. काम क्रोधादी मळापासून मुक्त होते आणि स्वतचा मार्ग मोकळा होतो.

संसारातून माणसाला तिळमात्र फुरसत मिळत नाही. संसारात राहून भगवंताच्या अस्तित्वाची, त्याच्या प्रेमाची आठवण ठेऊ शकतो. संसार करून परमार्थ करणे गरजेचे आहे. जवळपास कुठे आध्यात्मिक कार्य चालत असेल तेथे जाता येते. संसारातून थोडा वेळ काढावा लागेल. संसार सुखाचा होण्यासाठी पैसा एकमेव मार्ग आहे पण अतिप्रमाणात लोभ असणे चुकीचे आहे. लोभी माणसाचा संसार सुखाचा होण्याऐवजी दुःखाचा होतो.

पुरुषोत्तम बैसकार, मोझरकर
श्री गुरुदेव प्रचारक, यवतमाळ
फोन- 9921791677