युवाक्रांती समाचार

08-01-2024

पतंग उडवण्याची हौस जीवावर बेतली.! 9 वर्षांच्या चिमुकल्याचा गेला जीव.!

बीड:-

लहान मुलांच्या डोळ्यात तेल घालून लक्ष द्या, थोडंसं दुर्लक्ष चिमुकल्यांच्या जीवावर बेतू शकत. अशीच एक धक्कादायक घटना समोर आली आहे. मकर संक्रांत जवळ आली आहे, त्यानिमित्ताने आता बाजारपेठेत पतंग मिळत आहेत.
लहान मुलांना पतंग उडवण्याची हौस भारी असते. मात्र याच पतंगाच्या मागे जाताना चिमुकल्यासोबत दुर्घटना घडली आहे.

मोठ्या उत्साहाने चिमुकल्याने पतंग उडवला मात्र तो गॅलरीत जाऊन अडकला. आता अडकलेला पतंग काढण्यासाठी चिमुकल्याची कसरत सुरू झाली. त्याच दरम्यान गॅलरीतून पतंग काढत असताना त्याचा तोल गेला आणि तो खाली पडला. या दुर्घटनेत 9 वर्षांच्या चिमुकल्याचा मृत्यू झाला आहे.

ही धक्कादायक घटना बीड शहरातील शहरातील पांगरी रोड परिसरात घडली. कृष्णा दिलीप तकीक यांचा मुलगा संध्याकाळच्या वेळी आपल्या घराच्या गच्चीवर पतंग उडवत होता. त्याचा पतंग आडकल्याने तो काढण्याचा प्रयत्न करत होता. पतंग काढत असताना तोल जावून तो गॅलरीतून खाली पडला.

यामध्ये त्याला गंभीर मार लागल्याने त्याचा मृत्यू झाला. दरम्यान चिमुकल्याच्या मृतदेहावर रात्री उमरद जहॉगिर येथे शोकाकुल वातावरणात अंत्यसंस्कार करण्यात आले. या घटनेने उमरद जहॉगिर व खापर पांगरी येथे हळहळ व्यक्त केली जात आहे. बीड ग्रामीण पोलीस ठाण्यात मृत्यू नोंद करण्यात आले आहे.