तरुणाचे क्रूर कृत्य .!आईवडिलासह बहिणीला संपवुन मृतदेह अंगणात टाकले.!

जयपूर: राजस्थानातील नागौर जिल्ह्यात एका २० वर्षीय तरुणाने तीक्ष्ण कुऱ्हाडीचे घाव घालून आपल्या आईवडिलांची आणि बहिणीची हत्या केल्याची घटना रविवारी घडली होती. पडुकलान गावातील या घटनेतील हल्लेखोर तरुणाला मोबाइलचे भयंकर व्यसन जडले होते. दिवसातील १५-१६ तासांहून अधिक वेळ तो मोबाइलमध्ये अडकलेला असे, अशी माहिती आता समोर आली आहे.

मोहित नावाचा हा तरुण एखाद्या हिंसक ऑनलाइन गेमच्या किंवा कंटेंटच्या विळख्यात अडकला होता. त्यामुळे त्याच्या वर्तनात काही बदल झाला होता का किंवा आरोग्याची काही समस्या निर्माण झाली होती का, याचा आता पोलीस तपास करत आहेत. यासंदर्भात एका पोलीस अधिकाऱ्याने सांगितले, "आम्ही या आरोपीची चौकशी करत आहोत. त्याच्या मोबाइलच्या तपासणीत त्याने आत्महत्या करण्याच्या पद्धतीविषयी माहिती शोधल्याचे सर्च हिस्ट्रीमधून समोर येत आहे. आईवडिलांची आणि बहिणीची हत्या केल्यानंतर, त्याने रात्रीच्या वेळी घरात तयार केलेल्या टाकीत उडी मारून जीव देण्याचाही प्रयत्न केला होता. मात्र तो अपयशी ठरला. केलेल्या हत्यांबद्दल आरोपीला किंचितही पश्चात्तापाची भावना असल्याचे दिसत नाही. त्याच्या देहबोलीवरून तो मानसिकदृष्ट्या अस्थिर असल्याचे दिसते.
या तरुणाने एका महिन्यापूर्वीच आपल्या आईवडिलांची हत्या करण्याचा कट रचला होता. मात्र त्याची अमलबजावणी करता आली नाही, असे पोलिसांच्या चौकशीत समोर आले आहे. या हत्यांमागील उद्देश अद्याप समोर आलेला नाही, असे पोलिसांनी सांगितले. कॉलेजमध्ये दुसऱ्या वर्षाला शिकत असलेल्या या आरोपीने प्रथम त्याची आई राजेश कंवर आणि बहीण प्रियांका कंवर या दोघी खोलीत झोपलेल्या असताना त्यांच्यावर कुऱ्हाडीने वार करून त्यांची हत्या केली. त्यानंतर त्यांचे रक्ताळलेले मृतदेह त्याने घराच्या अंगणात आणून टाकले. या दरम्यान, त्याचे वडील, दिलीप सिंह यांना जाग आली आणि ते बाहेर आले. तेव्हा मोहितने त्यांच्यावर हल्ला करून त्यांना ठार केले, असे तपासात समोर आल्याची माहिती पोलिसांनी दिली.
मोहितने वडिलांचा मृतदेह खेचत अंगणात आणला आणि तिथे मृतदेहांसोबत बसून राहिला. हे कुटुंब मागील वर्षीच चेन्नईहून राजस्थानात परतले होते आणि पडुकलान या गावात स्थायिक झाले होते. दिलीप सिंह हे दागिन्यांचे दुकान चालवत होते, तर मोहित त्यांना मदत करत होता, असे पोलिसांनी सांगितले.