युवाक्रांती समाचार

31-12-2023

रेती तस्करी करण्यासाठी गेलेल्या रेती चोर युवकावर वाळूचा ढीग कोसळून मृत्यु

सांगली : सांगली जिल्ह्यातील जत तालुक्यातल्या खंडनाळमध्ये वाळू चोरी करण्यासाठी गेलेल्या तरुणाचा दुर्दैवी मृत्यू झाल्याची घटना घडली. वाळू तस्करांनी साठवलेल्या वाळूचा ढिगारा अंगावर कोसळल्याने ढिगाऱ्याखाली अडकून तरुण ठार झाला आहे. जत तालुक्यातील बोर नदी पात्रात सदरची दुर्दैवी घटना घडली. सचिन सयाप्पा कुलाळ (वय २५, रा. कुलाळवाडी, खंडनाळ) असे मृत तरुणाचे नाव आहे. या घटनेत एक जण जखमी झाला. यामध्ये संशयित आरोपी सुरेश टेंगले, बिरुदेव टेंगल या दोघांविरुद्ध जत पोलिस ठाण्यात गुन्हा दाखल झाला आहे.

सचिन कुलाळ हा पत्नी, मुले, आई-वडिलांसमवेत राहत होता. शुक्रवारी रात्री खंडनाळ गावातील ट्रॅक्टर मालक सुरेश टेंगले यांनी त्यास वाळू भरण्यासाठी घेऊन गेले. रात्री चार-पाच मजूर मिळून बोर नदीपात्रातील वाळू चोरून ट्रॅक्टरमध्ये भरत होते. यावेळी नदी पात्रात वाळू उपशाने खोल खड्डा पडला होता.
रात्रीची वेळ असल्याने वाळू भरताना ढिगाऱ्याचा अंदाज आला नाही. वाळू उपसताना बाजूचा ढिगारा थेट अंगावरच कोसळला. सचिन पुढे असल्याने ढिगाऱ्याखाली सापडला. वाळूची ढेकळे असल्याने सचिनला डोक्याला, पाठीला जोराचा मार लागला. तो जागेवरच बेशुद्ध पडला. या दुर्घटनेत मजूर आकारम करे हा जखमी झाला. या घटनेत सचिनचा जागीच मृत्यू झाला. घटनेची माहिती मिळताच जत पोलिसांनी घटनास्थळी धाव घेऊन संशयितांवर गुन्हा दाखल करत एकास अटक केली आहे.