Today Latest News

25-04-2024

Bhandara News : भरधाव दुचाकी धडकली ट्रकला दोन जागीच ठार एक गंभीर

Bhandara News : नागपूरहून तुमसरमार्गे मध्य प्रदेशातील चिखला येथे स्वगावी जात असताना भरधाव दुचाकी ट्रकला आमोरासमोर आदळली. यात दोन जण ठार तर एक जण गंभीर झाला. ही घटना तुमसर-गोबरवाही मार्गावरील चिचोली- पवनारा येथे मंगळवारला सायंकाळी ७ वाजताच्या सुमारास घडली. विजय धुर्वे रा. चिखला (मध्य प्रदेश), तुफान उईके रा. टेकाडी सुकळी (मध्य प्रदेश) असे अपघातात मृत पावलेल्या तरुणांची नावे आहेत. समीर वट्टी रा. चिखला असे गंभीर जखमीचे नाव आहे.

दुचाकी चालक विजय धुर्वे हा आपल्या दोघा मित्रांसह ट्रिपल सिट नागपूरवरून काम आटोपून चिखला येथे जात होते. तुमसर-गोबरवाहीकडे जाताना समोरून येणारा भरधाव ट्रक पावसामुळे दिसला नाही. त्यामुळे भरधाव दुचाकी विरुद्ध दिशेने येणाऱ्या ट्रक क्रमांक सी. जी ०८ ए. एक्स ८१२२ ला धडकली. त्यात दुचाकी चालकासह मागे बसलेला युवक जागीच ठार झाला तर एक जण गंभीर जखमी झाला.

अपघाताची माहिती तुमसर पोलिसांना मिळताच ते तत्काळ घटनास्थळी दाखल होत पंचनामा करून मृतदेह शवविच्छेदनासाठी तुमसर उपजिल्हा रुग्णालयात पाठविण्यात आले. गंभीर जखमीला भंडारा येथे उपचारासाठी दाखल करण्यात आले.अपघाताला जबाबदार असलेल्या ट्रक चालकाला पोलिसांनी ताब्यात घेतले. घटनेचा अधिक तपास तुमसर पोलिस निरीक्षक नरेंद्र हिवरे यांच्या मार्गदर्शनात तुमसर पोलिस करीत आहेत.