सुपर फास्ट बातमी

19-08-2024

अन त्याने फेसबुक खाते उघडून अश्लील व्हिडीओ केले व्हायरल

बल्लारपूर : सध्या सोशल मीडिया आपल्या आयुष्याचा अविभाज्य घटक बनला आहे. याचे अनेक सदुपयोग आहेत; पण सोशल मीडियाचा योग्य पद्धतीने वापर केला नाही तर फार मोठी डोकेदुखीही ठरू शकते. अशीच घटना चंद्रपूर तालुक्यातील तरुणीसोबत घडली. या तरुणीला उत्तर प्रदेशातील तरुणाशी मैत्री करणं चांगलंच महागात पडले आहे. त्याने तिला ब्लॅकमेल करत व्हॉट्सअॅप, फेसबुक, इंस्टाग्रामवर तिची बदनामी केली. या प्रकारानंतर तरुणीने शनिवारी बल्लारपूर पोलिसांत तक्रार दाखल केली. पोलिसांनी उत्तर प्रदेशातील सूरजकुमार विजय शंकर याच्यावर विविध कलमांन्वये गुन्हा दाखलकेला आहे.

चंद्रपूर तालुक्यातील व बल्लारपूर पोलिस ठाण्याच्या हद्दीतील एका गावातील कल्पना (वय २२) (काल्पनिक नाव) ही तरुणी चंद्रपूर येथील एका महाविद्यालयामध्ये बी.ए. प्रथम वर्गात शिक्षण घेत आहे. तिचे व्हॉट्सअॅप, इंस्टाग्राम व फेसबुक अकाउंट आहे. या सोशल मीडिया चॅटिंगच्या माध्यमातून तिची ओळख उत्तर प्रदेश येथील एका व्यक्तीसोबत झाली. आरोपी सूरजकुमार विजय शंकर याने १ ते १३ ऑगस्ट दरम्यान सोशल चॅटिंगच्या माध्यमातून विश्वास संपादन केला. अशात त्या दोघांनी व्हिडीओ कॉलच्या माध्यमातून संपर्क सुरू केला. व्हिडीओ कॉल करताना अश्लील संभाषण, चित्र व अन्य

बाबीचे दर्शन घडले. याची थोडीही कल्पना त्या तरुणीला न देता, आरोपीने सर्व प्रकारचे व्हिडीओ अपलोड केले. एवढेच नव्हे तर ते इतर समाज माध्यमातील मित्रांत व्हायरल करण्याची तिला धमकी दिली. बनावट फेसबुक खाते उघडून अश्लील व्हिडीओ व्हायरल केले. अश्लील चॅटिंग व व्हिडीओ कॉल रेकॉर्डचे समाज माध्यमातील व्हॉट्सअॅप, इंस्टाग्राम आणि फेसबुक पेजला वितरण करून चरित्र हनन केले. हा घृणास्पद प्रकार पाहून तिचे अवसान गळाले. या प्रकाराला कंटाळून तिने पोलिस ठाणे गाठले. बल्लारपूर पोलिसांनी तरुणाविरुद्ध गुन्हा दाखल केला आहे. या घटनेचा तपास बल्लारपूर पोलिस ठाण्याचे निरीक्षक गाडे करीत आहेत.