नेते दिल्लीत, संभ्रम गल्लीत ! महाविकास आघाडीकडून नामदेव किरसान यांना संधी?

गडचिरोली गडचिरोली- चिमूर लोकसभा निवडणुकीसाठी प्रमुख राजकीय पक्षांचे उमेदवार अद्याप निश्चित झालेले नाहीत. काही जण मुंबईत, काही दिल्लीत तळ ठोकून आहेत. बुधवारी रात्री उशीरा काँग्रेसकडून डॉ. नामदेव किरसान यांच्या नावावर शिक्कामोर्तब झाल्याची माहिती आहे.

लोकसभा निवडणुकीसाठी २० मार्च रोजी अधिसूचना जारी झाली व लगेचच नामनिर्देशनपत्र विक्री व स्वीकृतीलाही सुरुवात केली. पहिल्या दिवशी एकही नामदनिर्देशनपत्र दाखल झाले नाही. चौघांनी एकूण १४ नामनिर्देशनपत्रांची खरेदी केली, पण अर्ज दाखल करण्यास कोणीही पुढे आले नाही.

मतदारसंघातील उमेदवारीवरून निर्माण झालेला पेच कायम आहे. महायुतीत भाजप व राष्ट्रवादी काँग्रेस (अजित पवार गट) यांच्यात रस्सीखेच आहे, तर महाविकास आघाडीत मतदारसंघ काँग्रेसच्या वाट्याला गेला असून नामदेव उसेंडी व नामदेव किरसान यांच्यामध्ये चुरस होती. पक्षश्रेष्ठींनी किरसान यांच्या नावाला हिरवी झेंडी दिल्याची माहिती सुत्रांनी दिली.

काँग्रेसचे सर्व इच्छुक व प्रमुख पदाधिकारी हे दोन दिवसांपासून दिल्लीत ठाण मांडून आहेत. अधिकृत घोषणा गुरूवारी अपेक्षीत आहे.

नेते, धर्मरावबाबांकडून दबावतंत्राचा वापर

 १९ मार्च रोजी गडचिरोलीत खासदार अशोक नेते यांच्या समर्थकांनी पत्रकार परिषद घेऊन भाजपलाच उमेदवारी द्यावी, अशी मागणी लावून धरली होती. यावेळी राष्ट्रवादीला उमेदवारी देण्यास तीव्र विरोध दर्शवला होता. त्यानंतर सायंकाळी मंत्री धर्मरावबाबा आत्राम समर्थकांनी उपमुख्यमंत्री अजित पवार यांची भेट घेत दावेदारी प्रबळ केली. त्यामुळे महायुतीत भाजप विरुद्ध राष्ट्रवादी असा संघर्ष सुरू झाला आहे.

निवडणूक खर्च निरीक्षकांकडून आढावा

गडचिरोली-चिमूर लोकसभा मतदारसंघात २० मार्च रोजी निवडणूक खर्च निरीक्षक एस. वेणुगोपाल यांनी विविध ठिकाणी भेटी देत कार्यालयीन कामकाजाची पाहणी केली तसेच सहायक निवडणूक अधिकाऱ्यांकडून आढावा घेतला. आरमोरी, गडचिरोली, चिमूर व ब्रह्मपुरी या विधानसभा मतदार संघांना एस. वेणुगोपाल यांनी भेट दिली. जिल्हाधिकारी कार्यालयात जिल्हा निवडणूक अधिकारी संजय दैने यांनी त्यांचे स्वागत केले. यावेळी जिल्हा परिषदेच्या मुख्य कार्यकारी अधिकारी आयुषी सिंह, सहायक जिल्हाधिकारी राहुल मीना, ओमकार पवार, उपजिल्हा निवडणूक अधिकारी विवेक घोडके उपस्थित होते. सर्वसामान्य मतदार, निवडणूक लढणारे उमेदवार, राजकीय पक्ष यांनी निवडणूक खर्चविषयक तक्रारी एस. वेणुगोपाल यांच्याकडे किंवा निवडणूक विभागाच्या सी-व्हिजील या मोबाइल अॅपवर नोंदविण्याचे आवाहन करण्यात आले.