सुपर फास्ट बातमी

21-03-2024

सुधीर मुनगंटीवारांच्या विरोधात वडेट्टीवारांच्या नावाची चर्चा

काँग्रेसची नवी खेळी : चंद्रपूरच्या उमेदवारीवरून दिल्लीत खलबते

चंद्रपूर : चंद्रपूर लोकसभा मतदारसंघातून काँग्रेस आमदार प्रतिभा धानोरकर यांनाच मैदानात उतरविणार असल्याची चर्चा जिल्ह्यात आली. काही वेळानंतर काँग्रेसचे ज्येष्ठ नेते विरोधी पक्ष नेते विजय वडेट्टीवार यांचे नाव पुढे आले. काँग्रेस नेमकी धानोरकर यांच्या नावावर शिक्कामोर्तब करते वा वडेट्टीवारांना मैदानात उतरवून नवी खेळी करते, याकडे लक्ष लागले आहे. अधिकृत घोषणेकडे जनतेचे लक्ष लागले आहे.

चंद्रपुरात भाजपने सुधीर मुनगंटीवार यांच्या रूपाने दमदार उमेदवार रिंगणात उतरविला आहे. त्यांना टक्कर देण्यासाठी काँग्रेस कोणाच्या गळ्यात उमेदवारीची माळ घालते, यावरून खलबते सुरू होती. एकीकडे आमदार प्रतिभा धानोरकर तर दुसरीकडे नेते विरोधी पक्षनेते विजय वडेट्टीवार यांची कन्या शिवानी वडेट्टीवार यांच्यात उमेदवारीसाठी जोरदार रस्सीखेच सुरू होती. चंद्रपुरात सुरू झालेला उमेदवारीचा तिढा मुंबईमार्गे दिल्लीत पोहोचला. मागील काही दिवसांपासून

धानोरकर आणि वडेट्टीवार गट दिल्लीत ठाण मांडून आहे. दोन्ही गट आपापल्या दावेदारीवर ठाम असल्याने काँग्रेसला ही उमेदवारी जाहीर करताना संभाव्य धोके विचारात घेणे गरजेचे असल्याची चर्चा होती. अखेर बुधवारी दिल्लीत हायकमांडने आमदार प्रतिभा धानोरकर यांच्या उमेदवारीवर शिक्कामोर्तब केल्याची वार्ता चंद्रपुरात पोहोचली. मात्र, काही वेळातच शिवानी वडेट्टीवार याचे नाव मागे पडून त्याऐवजी विजय वडेट्टीवार यांचे नाव अचानक पुढे आल्याने नवीन समीकरणे पुढे येण्याची शक्यता वर्तविली जाऊ लागली आहे. वडेट्टीवारांना उमेदवारी मिळाली तर दोन वारांमध्ये लोकसभेचा महासंग्राम होईल, असे दिसते.