सुपर फास्ट बातमी

01-03-2024

...अन् वाहकाला प्रवाशांच्या सीटवर ठेवावे लागले पाय

सिरोंचा : पंतप्रधानांच्या यवतमाळ येथे होणाऱ्या कार्यक्रमानिमित्त अहेरीआगारातून तब्बल १० बसेस पाठविण्यात आल्याने अहेरी आगारात बसेसेचा तुटवडा निर्माण झाला. सिरोंचासाठी तब्बल पाच तासांनी बस सोडण्यात आली. त्यामुळे बसमध्ये गर्दी एवढी झाली की, बसच्या मागच्या बाजुला गेलेल्या बस वाहकाला त्याच्या सीटकडे येण्यासाठी जागाच उरली नाही. त्यामुळे प्रवाशांच्या सीटवर पाय ठेवत वाहकाने आपली सीट गाठली, त्याचा हा व्हिडीओ सोशल मीडियावर व्हायरल होत आहे.

अहेरी ते सिरोंचा १०७ किलोमीटरच्या या मार्गावर मागील काही वर्षांपासून जीवघेणा प्रवास सुरू आहे. रस्त्यावरील खड्डे अन् एसटी महामंडळात असलेल्या बसची कमतरता यामुळे नागरिकांना अनेक अडचणींना सामोरे जावे लागत आहे. मंगळवारी ८:०० वाजेपासून सिरोंचासाठी एकही बस नसल्याने या मार्गावरील प्रवाशांना पाच तास ताटकळत राहावे लागले. अखेर दुपारी १:०० वाजताच्या सुमारास अहेरी आगारातून सिरोंचासाठी आलापल्ली येथे बस लागली. मात्र, ती बस अगोदरच फुल्ल भरून आल्याने येथील प्रवाशांना नाइलाजास्तव भरगच्च भरलेल्या बसमधून उभ्यानेच प्रवास करावा लागला. बस अगोदरच भरली होती. त्यातच नवीन प्रवाशांना बसवणे आवश्यक होते. उभे असलेले प्रवाशी बसच्या मागच्या बाजूस सरकत नसल्याने नवीन प्रवाशांना जागा होत नव्हती. त्यामुळे वाहकाने प्रवाशांना मागे सरकवले. त्यानंतर वाहकाला आपल्या सीटवर येण्यास जागाच राहिली नाही. परिणामी त्याने प्रवाशांच्या सीटवर पाय ठेवत आपली सीट गाठली. हा व्हिडीओ सोशल मीडियावर मोठ्या प्रमाणात व्हायरल होत आहे.