सुपर फास्ट बातमी

12-02-2024

बसमध्ये चोरी; ठाण्यात सर्वच प्रवाशांची झडती, महिलेच्या पर्समधून ७० हजार लंपास

गडचिरोली : चामोर्शी ते गडचिरोली या प्रवासादरम्यान एका महिला प्रवाशाच्या पर्समधून सुमारे ७० हजार रुपयांची रोकड लंपास केल्याची घटना शनिवारी दुपारी ३ वाजताच्या सुमारास घडली. याप्रकरणी महिलेच्या मागणीनुसार ब्रस थेट गडचिरोली पोलिस स्टेशनमध्ये लावण्यात आली. पोलिसांनी बसमधील ५३ प्रवाशांची झडती घेतली. मात्र कोणाकडेही पैसे आढळून आले नाहीत. त्यामुळे त्यांना सोडण्यात आले.

गोंडपिंपरी तालुक्यातील राळापेठ येथील पौर्णिमा राजू राऊत यांचे गडचिरोली तालुक्यातील वाकडी येथील माहेर आहे. माहेरी येण्यासाठी सर्वप्रथम त्या आष्टी येथून चामोर्शी येथे पोहोचल्या. नंतर चामोर्शी येथून अहेरी ब्रह्मपुरी या बसमध्ये बसल्या. त्यांच्यासोबत त्यांची दोन लहान मुले होती. बसमध्ये गर्दी असल्याने त्या सर्वात मागच्या सिटरवर जाऊन बसल्या. दरम्यान, येवली येथे बस आल्यानंतर पर्स बघितले असता पर्समध्ये पैसे नसल्याचे दिसून आले. त्यामुळे त्यांना धक्काच बसला. वैशाली यांनी ही बाब बसचे वाहक पौर्णिमा टेंभुर्णे यांच्या लक्षात आणून दिली. बस गडचिरोली पोलिस स्टेशनमध्ये लावण्यात आली. यावेळी बसमध्ये ५३ प्रवासी होते. सर्व प्रवाशांची पोलिसांनी झडती घेतली. मात्र एकाही प्रवाशाकडे पैसे आढळले नाही. या प्रकरणाचा तपास ठाणेदार अरुण फेगडे यांच्या मार्गदर्शनात केला जात आहे.

दोघे तळोधीत, नऊ जण कुनघाडात उतरले

याबाबत वैशाली राऊत यांनी सांगितले की, त्यांनी चामोर्शीत पर्स तपासली तेव्हा पर्समध्ये पैसे होते. त्यामुळे पैसे चामोर्शीनंतरच्या प्रवासादरम्यान चोरीला गेले असण्याची शक्यता आहे. • दोन प्रवासी तळोधीत तर नऊ प्रवासी कुनघाडात उतरले. त्यांच्यापैकीच काही जणांनी पैसे लंपास केले असण्याची शक्यता वैशाली यांनी व्यक्त केली आहे.