सुपर फास्ट बातमी

27-01-2024

मामाने आपल्या १४ वर्षीय भाचीचेच केले लैंगिक शोषण

अमरावती : मामाने आपल्या १४ वर्षीय भाचीचेच लैंगिक शोषण केले. ही धक्कादायक घटना मध्यप्रदेशातील मुलताई तालुक्यातील एका गावात घडली. पीडित मुलीला जिल्हा सामान्य रुग्णालयात दाखल केल्यावर वैद्यकीय तपासणीनंतर ही घटना उघडकीस आली. या प्रकरणी कोतवाली पोलिसांनी आरोपी मामाविरुद्ध गुन्हा दाखल केला आहे.

पीडित मुलीच्या शाळेला २२ जानेवारी रोजी सुटी होती. ती गावातील एका कार्यक्रमात जेवण करण्यासाठी गेली होती. परत येत असताना रस्त्यात तिला तिची मामी भेटली. त्यामुळे ती मामीसोबत त्यांच्याकडे गेली. मामी बाहेर गेल्‍यानंतर पीडित मुलगी व तिचा मामा हे दोघे घरी होते. त्याने तिचे लैंगिक शोषण केले. सदर घटनेनंतर पीडित मुलगी ही कशीबशी घरी पोहोचली. तिने घडलेला प्रसंग आईला सांगितला.

दरम्यान, पीडित मुलीची प्रकृती बिघडल्याने तिला वरूड येथील खासगी रुग्णालयात नेण्यात आले. तेथून तिला जिल्हा सामान्य रुग्णालयात हलविण्यात आले. वैद्यकीय तपासणीत तिच्यावर अत्याचार झाल्याचे समोर आल्यावर कोतवाली पोलिसांना माहिती देण्यात आली. पोलिसांनी रुग्णालय गाठून पीडित मुलीचा जबाब नोंदविला. त्या आधारावर कोतवाली पोलिसांनी आरोपी मामाविरुद्ध गुन्हा दाखल केला. सदर प्रकरण मध्यप्रदेशातील संबंधित ठाण्यात वर्ग करण्यात येणार आहे.