सुपर फास्ट बातमी

26-01-2024

Gadchiroli news: सासऱ्याच्या खुनाचा प्रयत्न करणाऱ्या आरोपी जावयास जिल्हा व सत्र न्यायालयाने ठोठावला ५ वर्षाचा कारावास व ५ हजार रूपये दंडाची शिक्षा

गडचिरोली - सासऱ्याच्या खुनाचा प्रयत्न करणाऱ्या आरोपी जावयास जिल्हा व सत्र न्यायालयाने ५ वर्षाचा कारावास व ५ हजार रूपये दंडाची शिक्षा आज २५ जानेवारी रोजी ठोठावली आहे. वैभव सखाराम गावडे रा. सिदेसुर, पो. येरकड, ता. धानोरा असे आरोपीचे नांव आहे.

चुडीयाल येथील हिरामण ताडाम (५५) यांची मुलगी वैभव गावडे याला दिली आहे. तो व्यसनी असल्याने हिरामण ताडाम यांनी आपल्या मुलीस माहेरी आणले. १२ सप्टेंबर २०२० रोजी ताडाम आपल्या कुटुंबासह झोपी गेलेअसता रात्री ९.३० वा. दरम्यान आरोपी दारुच्या नशेत येवुन मुलीला झोपेतून उठवुन व त्यांना मौजा सिंदेसुर येथे घेवून जातो असे म्हणत असतांना ताडाम यांनी अटकाव केला असता आरोपीने त्यांच्यावर चाकुने वार करण्याचा प्रयत्न केला व घटनास्थळावरून पळ काढला. या संदर्भात धानोरा पोलिस ठाण्यात तक्रार दिली असता आरोपीस अटक करून प्रकरण न्यायप्रविष्ठ करण्यात आले.

या प्रकरणी जिल्हा व सत्र न्यायाधीश आशुतोष नि. करमरकर यांनी आरोपीस कलम ३०७ भा.द.वी. मध्ये दोषी ठरवुन ५ वर्ष शिक्षा व ५००० रुपये दंड ठोठावला आहे. दंड न भरल्यास ६ महिने वाढीव शिक्षा सुनावली आहे.

सरकार पक्षातर्फे सहा. जिल्हा सरकारी वकील निलकंठ एम. भांडेकर यांनी कामकाज पाहिले