सुपर फास्ट बातमी

20-01-2024

Nagpur news: भरधाव टँकरने बहीण-भावाला चिरडले,भाऊ जागीच ठार, बहीण गंभीर

बुटीबोरी, . मोटर सायकलने गावी जात असलेल्या बहीण भावाला टँकर चालकाने आपले ताब्यातील वाहन निष्काळजीपणे चालवून जोरदार धडक दिली. यात भावाचा जागीच मृत्यू झाला तर बहीण गंभीर जखमी झाली. ही घटना राष्ट्रीय महामार्गावरील जलसा धाब्यासमोर नागपूर-चंद्रपूर मार्गावर बुधवारी दुपारी 4.30 चे सुमारास बुटीबोरी पोलिस ठाण्याच्या हद्दीत घडली. शुभम अरविंद शेंडे (25) राहणार हमदापुर, ता. सेलू, जिल्हा वर्धा असे घटनेतील मृत्यू झालेल्या तरुणाचे नाव असून वैष्णवी अरविंद शेंडे (23) असे गंभीर जखमीअसलेल्या तरुणीचे नाव आहे.

प्राप्त माहितीनुसार शुभम आणि वैष्णवी हे दोघे बहीण भाऊ घटनादिनी नागपूर वरून आपले गावी मोटरसायकल क्र. एम एच 32 ए वी 0877 ने जात होते. दरम्यान घटनावेळी नागपूर-चंद्रपूर मार्गावरील जलसा धाब्यासमोर पोहचताच मागून येत असलेल्या भरधाव टँकर क्र.जी जे 12 बीडब्ल्यू 2283 च्या चालकाने आपल्या ताब्यातील वाहन निष्काळजीपणे चालवून रस्ता दुभाजकाच्या कट आउट वरून वळण घेतले. यामध्ये मोटरसायकल ही टैंकरला मागच्या बाजूला धडकली आणि शुभमचे त्यावरून संतुलन बिघडून तो टँकरच्या मागील चाकाखाली आल्याने त्याचा जागीच मृत्यू झाला तर वैष्णवी ही गंभीर जखमी झाली.

घटनेची माहिती बुटीबोरी पोलिसांना मिळताच ठाण्यातील सपोनि सतीश मेश्राम आणि पोहवा आशिष टेकाम हे आपल्या सहकाऱ्यांसह घटनास्थळी पोचून वैष्णवीला उपचारार्थ रवाना करून घटनेचा पंचनामा केला. शुभमचा मृतदेह ताब्यात घेऊन उत्तरीय तपासणी करिता रवाना करून घटनेची नोंद घेत आरोपी टैंकर चालकाविरुद्ध कलम 279,338,304 अ, भादवी सहकलम 184,134 अन्वये गुन्हा दाखल केला असून घटनावेळी आरोपी चालक हा घटनास्थळावरून पसार झाला होता. पोलिस त्यांचा शोध घेत असून पुढील तपास बुटीबोरी पोलिस करीत आहेत.