सुपर फास्ट बातमी

15-01-2024

Lakhandur news: प्रेमविरहात तरुणीची आत्महत्या

लाखांदूर (वा), दोन दिवसांपासून घरून बेपत्ता असलेल्या एका 20 वर्षीय तरुणीचा मृतदेह लाखांदूर तालुक्यातील तई/बुज येथील विहिरीत आढळून आला. या घटनेने गावात खळबळ उडाली. तिने प्रेम विरहातून आत्महत्या केल्याची चर्चा आहे.

प्रांजली शास्त्री कोल्हे रा. तई/ खुर्द असे मृत तरूणीचे नाव आहे. तई/खुर्द येथील रहिवासी असलेली प्रांजली कोल्हे ही 12 जानेवारीच्या रात्री आई झोपेत असल्याचे बघून रात्रीच घरून निघून गेली. आईने सकाळी उठून बघितले असता तिला प्रांजली आढळून आली नाही.

दरम्यान, आईने व कुटुंबीयांनी मुलगी बेपत्ता असल्यामुळे तिची गावात व इतरत्र शोधाशोध केली असता प्रांजली कुठेही आढळून आली नाही. अखेर पालांदूर पोलिस ठाण्यात तक्रार दाखल करण्यात आली. पालांदूर पोलिसांनी बेपत्ता तरूणीचा शोध घेत असताना 14 जानेवारी रोजी

सकाळच्या सुमारास प्रांजलीचा मृतदेह तई/बुज येथील राम मंदिरालगतच्या विहिरीत तरंगतांना आढळून आला. त्यानंतर घटनेची माहिती गावात पसरताच नागरिकांनी घटनास्थळी गर्दी केली. घटनेची माहिती पालांदूर पोलिसांना मिळताच पोलिस निरीक्षक चहांदे यांच्या मार्गदर्शनात पंचनामा करण्यात आला. दरम्यान प्रांजलीचे एका मुलावर प्रेम होते. मात्र प्रियकर मुलाचे काही दिवसांपूर्वी आजारामुळे निधन झाले. त्या प्रेमविरहात प्रांजलीने विहिरीत उडी घेऊन आत्महत्या केल्याची चर्चा आहे.