Dhanora crime news: मित्राचा खुन करून पेटवूनही दिले अन् प्रेताजवळ रात्रभर केला जागर

 धानोरा तालुक्यातील खेडी येथील खळबळजनक घटना

 Dhanora crime news धानोरा- नवीन वर्षाची पार्टी करत असताना संबंधातील भावाभावातच वाद होऊन दारूच्या नशेत कुऱ्हाडीने वार करून ठार केल्यानंतर प्रेतावर तणस टाकुन पेटवून दिले. तसेच रात्रभर प्रेताजवळ जागरही केल्याची खळबळ जनक घटना धानोरा तालुक्यातील खेडी (रांगी) येथे काल शनिवारी ०६ जानेवारी रोजी रात्री ८वाजताच्या सुमारास घडली. मनोहर नत्थु आत्राम (६५) रा. कन्हाळगाव असे मृतकाचे नांव आहे. तर जयदेव कोल्हू हलामी (६०) रा. कन्हाळगाव असे आरोपीचे नांव आहे. 

प्राप्त माहितीनुसार दोघेही एकाच गावातील रहिवासी असून दोघेपण जवळच असलेल्या एक किलोमीटर अंतरावरील खेडी येथे आठ ते दहा दिवसापासून विटा बनविण्याचे काम करीत होते. ६ जानेवारीला नवीन वर्षाची पार्टी करू असे दोघाहीमित्रांनी ठरवून सायंकाळच्या सुमारास विटा बनविण्याच्या शेत शिवारात बसले. दोघेही दारू प्राशन केल्यानंतर मृतक मनोहर याने 'तू विटा कमी काढतोस, मी जास्त काढतो' असे जयदेवला बोलण्यास प्रारंभ केला. मित्र या नात्याने चापटी मारत असतांना अचानक जोराने मारले. त्यावेळी राग अनावर झाल्याने जयदेव याने जवळच असलेल्या कुन्हाडीच्या मागील भागाने मनोहर याच्यावर जोरदार प्रहार केला. यामध्ये मनोहर याचा मृत्यू झाला.

तणसीवर प्रेत ठेऊन पेटवूनही दिले

 मनोहर याचा मृत्यू झाल्याचे निदर्शनास येताच जयदेव याची धुंदी उतरली. आता नेमके काय करायचे या विचारात असतांना त्याने झोपडीत असलेल्या तणसीवर मनोहर याचे प्रेत ठेऊन त्यावर ब्लॅकेट टाकले व पेटवून दिले. यामध्ये राहण्यासाठी बांधलेली झोपडी सुद्धा पेटली. दरम्यान आरोपी जयदेव रात्रभर तिथेच बसून राहिला. हा सर्व प्रकार आज सकाळी माहीत झाल्यानंतर पोलिस पाटलांनी धानोरा पोलिस ठाण्यात फोन करून सदर घटनेची माहिती दिली. पोलिसांनी घटनास्थळ गाठून संशयित आरोपी म्हणून जयदेव हलामी याला ताब्यात घेतले. पोलिसांकडून अधिक तपास केला असता त्याने पोलिसासमोर गुन्ह्याची कबुली दिली. अधिक तपास धानोराचे उपविभागीय पोलिस अधिकारी यांच्या आदेशावरून धानोरा पोलिस ठाण्याचे पोलिस निरीक्षक करीत आहेत.