सुपर फास्ट बातमी

03-01-2024

Nagpur news: दारूसाठी पैशांचा तगादा; संतप्त पत्नीने दगडाने ठेचून केली पतीची हत्या

नागपूरः दारू पिण्यासाठी पैशाच्या तगादा लावण्याच्या वादातून संतप्त पत्नीने दगडाने डोके ठेचून पतीची हत्या केली. ही थरारक घटना नवीन कामठी पोलीस ठाण्याच्या हद्दीतील आवंढी येथे उघडकीस आली. आनंद भदुजी पाटील (४५) असे मृतकाचे नाव आहे. अरुणा पाटील असे मारेकरी पत्नीचे नाव आहे. आनंद हा श्रमिक होता. पोलिसांनी दिलेल्या माहितीनुसार, आनंदला दारूचे व्यसन असल्याने ते भागविण्यासाठी तो पत्नीकडे नेहमी पैसे मागायचा.

शनिवारी रात्रीही त्याने पत्नीकडे दारू पिण्यासाठी पैसे मागितले. पत्नीने पैसे देण्यास नकार दिला. दोघांमध्ये वाद झाला. काही वेळाने आनंद हा झोपला. सतत वाद घालत असल्याने अरुणा संतापल्या. आनंद झोपेत असतानाच त्यांनी दगडाने डोके ठेचून त्याचा खून केला. रात्रभर त्या मृतदेहासोबत राहिल्या. रविवारी सकाळी ६ वाजताच्या सुमारास अरुणा यांनी घराला कुलूप लावले. थेट नवीन कामठी पोलीस ठाणे गाठले. पतीची हत्या केल्याची माहिती दिली. पोलिसांमध्ये काही काळ खळबळ उडाली. लगेच पोलिसांचा ताफा आवंढी येथे पोहोचला. पोलिसांनी पंचनामा करून मृतदेह उत्तरीय तपासणीसाठी हॉस्पिटलकडे रवाना केला. याप्रकरणी नवीन कामठी पोलिसांनी खुनाचा गुन्हा दाखल करून अरुणा यांना ताब्यात घेतले आहे. अरुणा यांना मयूर नावाचा मुलगा आहे.