Dhanora news: जावयाच्या अंत्यविधीला आलेल्या सासऱ्याचा मृतदेहच आढळला

जेवलवाहीची घटना : गमछाने गळा आवळून खून केल्याचा संशय

धानोरा : जावयाच्या अंत्यविधीला आलेला सासरा अचानक बेपत्ता झाला, चार दिवसांनी गावालगत त्याचा मृतदेह आढळून आला. २ जानेवारीला तालुक्यातील जेवलवाही येथे ही घटना उघडकीस आली. त्यामुळे एकच खळबळ उडाली आहे. सासऱ्याच्या गळ्याभोवती गमछा गुंडाळलेला आढळला, त्यामुळे गळा आवळून हत्या केली असावी, असा पोलिसांचा कयास आहे.

जनू घिसू पोरेट्टी (८४, रा. परसवाडी, ता. धानोरा), असे मयताचे नाव आहे. जनू पोरेट्टी यांना निर्मला कल्लो ही एकुलती एक मुलगी असून, ती जेवलवाही येथे राहते. जनू हे पुतण्याकडे गावी असायचे. २७ डिसेंबरला जनू पोरेट्टी यांचे जावई साहू कल्लो यांचे आजारपणामुळे निधन झाले.

जावयाचे निधन झाल्याचे कळल्यावर जनू पोरेट्टी हे नातेवाइकांसोबत जेवलवाहीला पोहोचले. २८ डिसेंबर रोजी अंत्यविधी होण्यापूर्वीच जनू पोरेट्टी गायब झाले.

अंत्यविधी उरकल्यावर त्यांचा शोध घेतला असता ते कोठेही मिळून आले नाहीत. परसवाडी ते जेवलवाही हे १७ किलोमीटर अंतर आहे त्यामुळे नातेवाइकांनी येरकड पोलिस मदत केंद्र ठाण गाठून ते बेपत्ता असल्याची तक्रार दिली. दरम्यान, २ जानेवारी रोजी जेवलवाही गावापासून जवळच एका शेतालगत त्यांचा मृतदेह शेतीकाम करण्यासाठी गेलेल्या मजुरांनाआढळून आला.

 त्यांच्या गळ्यातील गमछा गळ्याला गुंडाळलेला असल्याचे निदर्शनास आले. येरकड मदत केंद्रातील पोलिसांनी धाव घेतली. पंचनामा करून मृतदेह उत्तरीय तपासणीसाठी धानोरा ग्रामीण रुग्णालयात पाठवला. त्यांचा गळा आवळून खून केल्याचा अंदाज आहे.  या घटनेने खळबळ उडाली असून तपास पोलिस करीत आहेत.

लेकीवर दुहेरी आघात

दरम्यान, जनू पोरेट्टी यांची मुलगी निर्मला कल्लो हिच्यावर या घटनेने दुहेरी आघात झाला आहे. पतीच्या निधनाने तिच्यावर दुःखाचा डोंगर कोसळलेला असतानाच बेपत्ता वडिलांचा मृतदेह आढळून आला. चार दिवसांच्या फरकाने पतीपाठोपाठ वडीलही गेल्याची बातमी कळल्यावर तिने एकच आक्रोश केला.