सुपर फास्ट बातमी

03-01-2024

Armori news वनाधिकाऱ्यांविरुद्ध पोलिस ठाण्यात तक्रार.. उडाली एकच खळबळ

शंकरनगरातील घटनेने संताप : मनुष्यवधाचा गुन्हा नोंदविण्याची मागणी

गडचिरोली : आरमोरी वनपरिक्षेत्रात रानटी हत्तींचा उपद्रव सुरू असून शंकरनगरात वृद्धेचा बळी गेल्यानंतर राष्ट्रवादी काँग्रेसने (अजित पवार गट) आक्रमक पवित्रा घेतला आहे. वनाधिकाऱ्यांविरुद्ध मनुष्यवधाचा गुन्हा नोंदवावा, या मागणीसाठी १ जानेवारीला पोलिस ठाण्यात तक्रार दिल्याने खळबळ उडाली आहे.

आरमोरीत गेल्या काही दिवसांपासून रानटी हत्तींचा धुमाकूळसुरू आहे. पळसगाव, पाथरगोटात धुडगूस घातल्यानंतर हत्तींचा मोर्चा शंकरनगराकडे वळला, घरावर चाल करून आलेल्या हत्तींपासून जीव वाचावा म्हणून धावत सुटलेल्या कौशल्या राधाकांत मंडल या वृद्धेला गाठून हत्तींनी चिरडले. वनविभागाकडून हत्तींबाबत पूर्वकल्पना दिली जात नाही.

ठोस उपाय होत नाहीत, त्यामुळे हल्ल्यांचे सत्र सुरू असल्याचा आरोप करत राष्ट्रवादीचे जिल्हा उपाध्यक्ष दिलीप मोटवाणी यांनी आरमोरी ठाण्यात लेखी तक्रार देऊन कौशल्या मंडल यांच्या मृत्यूला जबाबदार धरून वनाधिकाऱ्यांवर कारवाईची मागणी केली आहे. वनपरिक्षेत्राधिकारी अविनाश मेश्राम, वनपाल मुखरू किनेकार व वनरक्षक बळीराम आतकरे यांच्यावर सदोष मनुष्यवधाचा गुन्हा नोंद करावा, अशी मागणी केली आहे.