सुपर फास्ट बातमी

30-12-2023

Nagpur news: अन् अमितने तिच्या इच्छेविरुद्ध शारीरिक संबंध प्रस्थापित केले.

नागपूर : इंस्टाग्रामवरून ओळख झालेल्या युवकाने तरुणीला घरी नेऊन वारंवार बलात्कार केला. तिला लग्न करण्याचे आमिष दाखवले. मात्र, लग्न करण्यास नकार दिला. या प्रकरणी तरुणीच्या तक्रारीवरून युवकाविरुद्ध बलात्काराचा गुन्हा दाखल केला. अमित सुमित मालेवार (२९, बजाजनगर) असे आरोपीचे नाव आहे.

पीडित २५ वर्षीय तरुणी एका खासगी कंपनीत नोकरी करते. तिची इंस्टाग्रामवरून अमित मालेवार याच्याशी ओळखी झाली. अमित हा मूळचा तुमसर-भंडारा येथील असून तो नागपुरात एका खासगी कंपनीत नोकरी करतो. दोघांचा नेहमी दुरध्वनीवरून संवाद होत होता. त्यानंतर दोघांच्या भेटी व्हायला लागल्या. अमितने २१ डिसेंबर २०२१ ला तरुणीला वाढदिवस असल्याचे सांगून बजाजनगरातील भाड्याने घेतलेल्या घरी नेले. तेथे वाढदिवसासाठी गेल्यानंतर घरात कुणीच दिसले नाही. काही वेळातच अमितने बाहेरून जेवन बोलविले. त्यानंतर तरुणीला शारीरिक संबंधाची मागणी केली. तरुणीने नकार दिला असता अमितने तिच्या इच्छेविरुद्ध शारीरिक संबंध प्रस्थापित केले. तासाभरात तरुणी रागाच्या भरात घरी निघून गेली. काही दिवस दोघांचीही एकमेकांशी बोलचाल बंद होती.

२५ जानेवारीला अमित तरुणीच्या कार्यालयात गेला. तेथे तिची भेट घेऊन माफी मागितली. त्यानंतर तिला बाहेर फिरविण्यासाठी घेऊन गेला. काही दिवसात त्याने पुन्हा तिला घरी नेले आणि शारीरिक संबंध प्रस्थापित करण्याचा प्रयत्न केला. तरुणीने नकार देताच तिला लग्न करण्याचे आमिष दाखवले. त्याने लग्न करण्याची तयारी दर्शविल्यामुळे दोघेही वारंवार शारीरिक संबंध ठेवत होते. दिवाळीमध्ये तरुणीने अमितला लग्नाबाबत कुटुंबियांशी चर्चा करण्यासाठी बोलावले. मात्र, बहाणा करून टाळाटाळ केली. त्यानंतर तो लग्नास नकार देऊन लैंगिक शोषण करायला लागला. त्यामुळे कंटाळलेल्या तरुणीने बजाजनगर पोलीस ठाण्यात तक्रार दिली. पोलिसांनी बलात्काराचा गुन्हा दाखल केला असून लवकरच अटक करण्यात येणार आहे.