सुपर फास्ट बातमी

23-12-2023

सरपंच व नागरिकामध्ये ' तुफान फ्री स्टाईल'!

तुमखेडा खुर्द येथील घटना : तक्रारीवरुन गोंदिया ग्रामीण पोलिस ठाण्यात गुन्हा दाखल

गोंदिया : ग्रामपंचायतमध्येच सरपंच आणि नागरिकांमध्ये वाद होऊन या वादाचे रुपांतर हाणामारीत झाल्याची घटना गुरुवारी (दि.२१) दुपारी गोंदिया तालुक्यातील तुमखेडा खूर्द येथे घडली, दरम्यान, सरपंचाने गोंदिया ग्रामीण पोलिसात केलेल्या तक्रारीनंतर आरोपीला पोलिसांनी अटक केली आहे. दरम्यान, या प्रकरणामुळे गावातील वातावरण काही काळ तापले होते. गोंदिया ग्रामीण पोलिस स्टेशन अंतर्गत येत येणाऱ्या तुमखेडा खुर्द

येथील सरपंच आशिष दुलीचंद हत्तीमारे (३५) हे गुरुवारी दुपारी ग्रामपंचायतीमध्ये बसलेले होते. त्यावेळी आरोपी प्रेमलाल मोहन मेंढे (५२) यांनी ग्रामपंचायत बसलेल्या सरपंचांसोबत वाद घातला नंतर त्याने चाकूने हल्ला केल्याचा आरोप आहे. दरम्यान, ग्रामपंचायत बाहेर बसलेल्या इतर सदस्यांनी लगेच सतर्कता दाखविल्यामुळे हा चाकूहल्ला टाळता आला. इतरांच्या मध्यस्थीने वाद मिटवण्याचा प्रयत्न झाला, पण हा वाद अखेर ग्रामपंचायतीच्या आतमधूनबाहेरपर्यंत येऊन या दोघांमध्ये 'फ्री स्टाईल' ने हाणामारीत झाला.

यावेळी ग्रामपंचायतीत उपस्थितांनी घटनेचे चित्रण मोबाईल कॅमेरात केले असून समाजमाध्यमांवर पसरविले. त्यानंतर सरपंचांनी गोंदिया ग्रामीण पोलिस स्टेशन येथे तक्रार दाखल केली आहे.

या प्रकरणातील आरोपी प्रेमलाल मेंढे विरुद्ध गोंदिया ग्रामीण पोलिसांनी भादंविच्या कलम २९४, ३२४, ५०६ अन्वये गुन्हा दाखल केला आहे. पोलिसांनी आरोपीला अटक केली आहे.