Dipak Indurkar

27-10-2024

Crime News: धक्कादायक घटना! अंगणवाडी सेविकेवर अत्याचार करून भिंतीवर डोके आपटून निर्घृण खून; मृतदेह टाकला नदीपात्रात

Crime News: अहिल्यानगर जिल्ह्यातून एक हृदय पिळवटून टाकणारी घटना समोर आली आहे. अंगणवाडी सेविकेवर अत्याचार करून तिचा निर्घृण खून केल्याचे समोर आले आहे. ही घटना चिचोंडी पाटील या गावात घडली आहे.

पोलिस तपासात समोर आले आहे की, आरोपीने पुरावा नष्ट करण्याच्या उद्देशाने मृतदेह फरफटत नेऊन नदीच्या पाण्यात फेकून दिला. आरोपीला ताब्यात घेतल्यानंतर त्याने या गुन्ह्याची कबुली दिली आहे. अटक करण्यात आलेल्या आरोपीचे नाव सुभाष बंडू बर्डे (वय 25, रा. कुक्कडवेढे, ता. राहुरी, हल्ली रा. चिचोंडी पाटील) असे आहे.

हे देखील वाचा: Satara News: धक्कादायक! दोन चिमुकलींना कंबरेला बांधून महिलेने घेतली तलावात उडी

पोलिसांच्या माहितीनुसार, अंगणवाडी सेविका गुरुवारी (दि. 24) सकाळी नेहमीप्रमाणे अंगणवाडीत गेल्या होत्या. त्यानंतर त्यांनी सुभाष बर्डेला त्याच्या मुलीसाठी पोषण आहाराचे साहित्य घेण्यासाठी बोलावले. दुपारच्या सुमारास तो अंगणवाडीत पोहोचला आणि तेथे सेविका एकटी होती. त्याने या संधीचा फायदा घेत अत्याचार करण्याचा प्रयत्न केला, मात्र सेविकेने प्रतिकार केला असता त्याच्या झटापटीत आरोपीने तिचे डोके भिंतीवर आपटले, ज्यामुळे ती जागीच मृत झाली.

या घटनेची माहिती मिळताच नातेवाइकांनी शोध घेतला आणि अंगणवाडीत जाऊन पाहणी केली असता, तेथे रक्ताचा सडा दिसून आला. ही माहिती पोलिसांना दिल्यानंतर पोलिसांनी घटनास्थळी धाव घेतली.

पोलिस अधीक्षक राकेश ओला यांनी या घटनेच्या तातडीने तपासाचे निर्देश दिले. तांत्रिक विश्लेषणाद्वारे सुभाष बर्डे याच्यावर संशय बळावला, त्याला ताब्यात घेतल्यानंतर त्याने गुन्ह्याची कबुली दिली. पुढील तपास सुरू असून आरोपीला न्यायालयीन कोठडीत ठेवले आहे.