Vaingangavarta19

13-02-2024

घराला लागली आग , क्षणार्धात पाच लाखांचे साहित्य स्वाहा

सिरोंचा :-
तालुक्यातील नरसिंहापल्ली येथील एका घराला मध्यरात्री आग लागून पाच लाखांचे साहित्य जळून खाक झल्याची घटना दहा फेब्रुवारी ला घडली
रविंद्र शंकर चेनूरी असे आग लागून घर व साहित्य जळालेल्या इसमाचे नाव असून घटनेच्या दिवशी संपुर्ण कुटुंब गाढ झोपेत होते तेव्हा अचानक घराला आग लागली. झोपडीच्या घराला आगीने काही क्षणातच कवेत घेतले. यात घरातील 30 क्विंटल कापूस व जीवनाउपयोगी साहित्य जळून खाक झाले
घराला आग लागल्याचे लक्षात येताच संपुर्ण कुटुंब घराबाहेर पडले म्हणून सुदैवाने कुटुंब थोडक्यात बचावले
.रवींद्र शंकर चेनुरी रा. नसिंहापल्ली हे झोपडीवजा घरात वास्तव्यास रहात होते. 10 फेब्रुवारी रोजी चेत्रुरी कुटूंब नित्याप्रमाणे जेवण करून झोपी गेले. मध्यरात्री अचानक घरातून आगीचे लोळ बाहेर पडण्यास सुरुवात झाली. पाहता पाहता संपूर्ण घरात आग पसरली. यात शेतातील पिकवलेला तीस क्विंटल कापूस साठा करून ठेवला होता तो 30 क्विंटल कापूस आगीच्या भक्ष्यस्थानी सापडून खाक झाला. संसारोपयोगी साहित्यासह संपूर्ण घराची आगीत राखरांगोळी झाली. यात अडीच लाखांचा कापूस व इतर साहित्य, असे पाच लाखांचे नुकसान झाल्याचा दावा रवींद्र चेनुरी यांनी केला आहे. दरम्यान, आग नेमकी कशामुळे लागली, याचे नेमके कारण समोर आलेले नाही. आर्थिक नुकसान भरपाई द्यावी, अशी मागणी होत आहे.

वर्षभर केलेली मेहनत क्षणात गेली वाया

दरम्यान, चेनुरी यांना दोन एकर शेती आहे. दुसऱ्याची तीन एकर शेती त्यांनी कसायला घेतली होती. पाच एकर शेतीत मोठ्या कष्टाने त्यांनी कापूस पिकवला होता. कापसाचे दर सध्या गडगडले असल्याने दर वाढेल या आशेने त्यांनी त्यांनी कापूस विकला नव्हता. मात्र, आगीने घात केला व वर्षभर केलेली मेहनत क्षणात वाया गेली.