News mh33 live

01-01-2024

आष्टी येथील हनुमान मंदीर येथे शेषराव महाराज व्यसनमुक्ती संघटनेतर्फे विविध कार्यक्रमांचे आयोजन

चामोर्शी : तालुक्यातील आष्टी येथे आज शेषराव महाराज व्यसनमुक्ती संघटनेतर्फे नवीन वर्षानिमित्त हनुमान मंदीर येथे विविध कार्यक्रमांचे आयोजन करण्यात आले.

यावेळी सरपंचा बेबीताई बुरांडे, पोलिस निरीक्षक कुंदन गावडे, शेषराव महाराज व्यसनमुक्ती संघटनेचे गोंडपिपरी तालुका अध्यक्ष गणपती चौधरी गुरुजी, शेषराव महाराज व्यसनमुक्ती संघटना आष्टीचे अध्यक्ष अंकलू पेरकावार, सुरेश औतकार यांच्यासह परिसरातील शिवभक्त मोठ्या संख्येने उपस्थित होते.

सर्वत्र नवीन वर्षाचं स्वागत अतिशय धुमधडाक्यात केलं जातंय. काल रात्री उशीरा अनेकांनी पार्टी करुन नवीन वर्षाचं स्वागत केलं. तसंच रात्री झोपताना अनेकांनी नवीन वर्षाच्या निमित्ताने काहीतरी संकल्पही केला असेल. इकडे, आष्टीत नवीन वर्षानिमित्त व्यसनाला दूर लोटूया म्हणत व्यसनमुक्ती संघटनेकडून नवीन वर्षात दारु नाही तर दुध प्या म्हणत दुधाचं वाटप केलं गेलं.

नवीन वर्षात दारू सोडण्याचा संकल्प करा. दारुचा प्याला खाली ठेवा अन् दुधाचा प्याला हातात घ्या, असा संदेश देत व्यसनमुक्ती संघटनेने आज दुधाचे वाटप केले. प.पु. शेषराव महाराज यांच्या व्यसनमुक्ती संघटनेतर्फे आष्टी शहरात ठिकठिकाणी दूध बिस्कीट वाटप केले.शहरात शेषराव महाराजांची पालखी मिरवणूक काढण्यात आली या पालखी मिरवणूकीतून दारू सोडा संसार जोडा असा संदेश देण्यात आला