महिलांना वेश्या व्यवसाय करण्यास भाग पाडणाऱ्या एका आरोपीला पोलिसांनी केली अटक

रग्गड पैसा कमवता येतो असे दाखवित होता आमीश

मुंबई : पैशांचे आमिष दाखवत महिलांना वेश्या व्यवसाय करण्यास भाग पाडणाऱ्या एका आरोपीला भांडुप पोलिसांनी अटक केली. आरोपीला अटक करतानाच पोलिसांनी दोन महिलांची सुटका केली असून याप्रकरणी पोलीस अधिक तपास करीत आहेत.भांडुपमधील सह्याद्री नगर परिसरात राहणारा शिरीशकुमार शेंडगे वय, 42 वर्ष काही महिलांना पैशांचे आमिष दाखवून वेश्या व्यवसाय करण्यास भाग पाडत असल्याची माहिती भांडुप पोलिसांना मिळाली. त्यानुसार पोलिसांनी बनावट ग्राहकाच्या मदतीने आरोपीची खात्री केली. त्यानंतर पोलिसांनी तो वास्तव्यास असलेल्या भांडुपमधील सह्याद्री नगरमध्ये मंगळवारी छापा घातला.

पोलिसांनी तेथून आरोपीसह दोन महिलांना ताब्यात घेतले. पोलिसांनी तत्काळ आरोपीला अटक केली आणि दोन्ही महिलांची सुटका केली. पोलीस याप्रकरणी अधिक तपास करीत आहेत

गडचिरोली जिल्ह्यात विकास निधी मागणीचे सुधारित प्रस्ताव दोन दिवसांत सादर करा - जिल्हाधिकारी 

गडचिरोली दि.३०: विविध योजनेंतर्गत निधी खर्च करतांना त्याद्वारे जिल्ह्यात शाश्वत विकासाची कोणती कामे पूर्ण होणार आहेत, याची माहिती देणे यंत्रणांना बंधनकारक आहे. विकास निधीची मागणी करतांना जिल्हा कोणत्या निर्देशांकात जिल्हा मागे आहे, याचे विश्लेषण करून सुधारित विकास निधी मागणी प्रस्ताव तसेच अतिरिक्त मागणी प्रस्ताव दोन दिवसांत सादर करण्याचे तसेच निधीच्या प्रभावी वापरावर भर देण्याच्या सूचना गडचिरोली जिल्हाधिकारी अविश्यांत  पंडा यांनी अधिकाऱ्यांना दिल्या.

आकांक्षित जिल्हा कार्यक्रम, मानव विकास कार्यक्रम, डोंगरी विकास कार्यक्रम आणि जिल्हा वार्षिक योजनेंतर्गत अतिरिक्त मागणी व कार्यक्रम अंमलबजावणीचा आढावा जिल्हाधिकारी यांनी काल नियोजन भवन येथे घेतला. बैठकीला जिल्हा परिषदेचे अतिरिक्त मुख्य कार्यकारी अधिकारी राजेंद्र भुयार, अतिरिक्त जिल्हा पोलिस अधीक्षक एस. रमेश, जिल्हा नियोजन अधिकारी श्रीराम पाचखेडे, उपवनसंरक्षक मिलीश शर्मा, पूनम पाटे, सहायक जिल्हाधिकारी राहुल मीना, श्रीमती मानसी, कुशल जैन, नमन गोयल, निवासी उपजिल्हाधिकारी सुनील सुर्यवंशी आदी प्रामुख्याने उपस्थित होते.

मानव विकास योजनेअंतर्गत विद्यार्थिनींसाठी ७७ बसेस उपलब्ध करून देण्यात आल्या असताना त्यांचा गैरवापर प्रवासी वाहतुकीसाठी होत असल्याचे जिल्हाधिकारी यांचे निदर्शनात आणून देताच त्यांनी यावर तातडीने कारवाई करण्याचे आदेश शिक्षणाधिकाऱ्यांना दिले तसेच जिल्हा परिषदेने यासाठी तपासणी पथक नेमण्याच्या सूचनाही दिल्या. यातील ५५ जुन्या बसेस बदलून नव्या बसेस उपलब्ध करून देण्याची कार्यवाही सुरू असल्याचेही त्यांनी सांगितले.

तालुका स्पेसिफीक योजनेंतर्गत प्रत्येक तालुक्यासाठी दोन कोटी रुपयांचा निधी उपलब्ध होऊ शकतो. यातून रोजगार निर्मितीसाठी मानव विकासाशी संलग्न कामे पूर्ण करण्याच्या मोठ्या संधी असल्याचे त्यांनी सांगितले.

विविध विकास कामांसाठी निधी खर्च करण्यात येतो मात्र त्यातून अपेक्षित उद्देश साध्य होतोय का, लाभार्थ्यांच्या गरजा ओळखून साहित्य खरेदी केली जाते का, खरेदी केलेले साहित्य संबंधीतांपर्यंत पोहचले का याची तपासणी करण्यासाठी विशेष पथक नेमण्याच्या सूचनाही जिल्हाधिकारी यांनी दिल्या.

2025-26 च्या वार्षिक योजनेसाठी अतिरिक्त निधी मागणी करणाऱ्या यंत्रणांनी त्या मागणीचे ठोस कारणे स्पष्ट करावी. तसेच जिल्ह्याच्या पुढील पाच वर्षांच्या विकास आराखड्यानुसार आणि पुढील एक वर्षात आवश्यक बाबींची प्राथमिकता निश्चित करून नियोजन करण्याचे जिल्हाधिकाऱ्यांनी सांगितले.

बैठकीला कृषी, आरोग्य, सिंचन, जलसंधारण, वन, महसूल, पशुसंवर्धन यासह विविध विभागाचे अधिकारी उपस्थित होते.

 तक्रार दाखल करुन घेण्यास टाळाटाळ करणाऱ्या दोन पोलीस कर्मचाऱ्याचे निलंबन तर ठाणेदाराची तडकाफडकी बदली 

 वर्धा:- पोलीस दलातून एक खळबळजनक माहिती समोर आली आहे. आर्वी पोलीस स्टेशन येथे तक्रार दाखल करुन घेण्यास टाळाटाळ करणाऱ्या दोन पोलीस कर्मचाऱ्यांवर निलंबनाची कारवाई करण्यात आली. तर पोलीस स्टेशनचे ठाणेदार यांची तडकाफडकी मुख्यालय ठिकाणी बदली करण्यात आल्याच्या घटनेने खळबळ उडाली आहे.

आर्वी येथील अजय कदम यांच्या मालकीच्या जागेवर इतरांनी जबरदस्तीने ताबा घेतल्या त्यामुळे अजय कदम यांनी पोलीस स्टेशन मध्ये जाऊन तक्रार दाखल करण्याबाबत पोलिसांना विनंती केली होती. पण या प्रकरणी तक्रार दाखल करुन घेण्यास टाळाटाळ करण्यात आली होती. तक्रार दाखल करुन घेण्यास टाळाटाळ करणाऱ्या दोन पोलीस कर्मचाऱ्यांवर निलंबनाची कारवाई करण्यात आली. तर ठाणेदार यांना तडकाफडकी मुख्यालय ठिकाणी बदली केली आहे.

पोलिस स्टेशन मध्ये तक्रार घेवून येणाऱ्याची तक्रार घेणे हे पोलिसांचे कर्तव्य असून त्यानंतर तपास करुन गुन्हा नोंद करणे आवश्यक आहे. पण, स्टेशन डायरीवरील कर्मचारी गजानन मरस्कोल्हे व अंमलदार सतिश नंदागवळी यांनी पोलीस निर8क्षक यांच्या आदेशाशिवाय तक्रार घेतली जाणार नाही, असे अजय कदम सांगितले. त्यानंतर बराच वेळ त्यांना पोलीस स्टेशन मध्येच बसवून ठेवले होते. त्यानंतर स्थानिक लोकप्रतिनिधींनी लक्ष घातल्यानंतर पोलिसांनी तक्रार दाखल करुन घेतली होती.

पोलिस कर्मचाऱ्याने कर्तव्य बजावण्यात कसूर केल्याने हे प्रकरण थेट पोलिस महानिरीक्षक यांच्या पर्यंत गेले. त्यानंतर पोलिस महानिरीक्षक दिलीप पाटील भुजबळ, वर्धा जिल्हाचे पोलीस अधीक्षक अनुराग जैन, अतिरिक्त पोलिस अधीक्षक वर्धा डॉ. सागर कावडे आर्वीत दाखल झाले. त्यांनी या प्रकरणाची सखोल चौकशी केल्यानंतर पोलीस स्टेशनचे पोलीस निरीक्षक यांची पोलीस मुख्यालयी बदली करण्यात आली. तर मरस्कोल्हे व नंदागवळी या दोन कर्मचाऱ्यांना निलंबित केले.

अमृतसर येथील महामानव डॉ. बाबासाहेब आंबेडकर यांच्या पुतळ्याच्या विटंबनेचा निषेध

शहरातील समस्त आंबेडकरी समाजाच्या वतीने जिल्हाधिकारी कार्यालया समोर निदर्शने, जन्मठेपेची शिक्षा देण्याची मागणी 

समाजकंटकावर देशद्रोहाचा गुन्हा दाखल करुन मरेपर्यंत जन्मठेपेची शिक्षा देण्याची मागणी

नगर - प्रजासत्ताक दिनी पंजाब मधील अमृतसर मध्ये महामानव डॉ. बाबासाहेब आंबेडकर यांच्या पुतळ्याच्या विटंबनेचा शहरातील समस्त आंबेडकरी समाजाच्या वतीने निषेध नोंदविण्यात आला. तर जिल्हाधिकारी कार्यालया समोर निदर्शने करुन सदरील समाजकंटकावर देशद्रोहाचा गुन्हा दाखल करुन मरेपर्यंत जन्मठेपेची शिक्षा देण्याची मागणी करण्यात आली. वारंवार बाबासाहेबांचा पुतळा व संविधानाच्या विटंबनेवर प्रश्‍न उपस्थित करण्यात आला.
प्रजासत्ताक दिनी अमृतसर मधील महामानव डॉ. बाबासाहेब आंबेडकर यांच्या पुतळ्यावर शिडीच्या सहाय्याने चढून एका समाजकंटकाने हातोड्याचे साहाय्याने सदर पुतळा फोडण्याचे कृत्य केले. सदर आरोपीला पोलिसांनी पकडले असून, त्याच्यावर कठोर कारवाई होणे अपेक्षित आहे. राज्य व केंद्र सरकार यांनी संयुक्तपणे कायदा करुन देशातील महापुरुषांचा अवमान व विटंबना करणाऱ्यावर देशद्रोहाचा गुन्हा दाखल करण्याची तरतुद केल्यास अशा प्रवृत्तींना लगाम लागणार आहे.  देशात सातत्याने महामानव डॉ. बाबासाहेब आंबेडकर यांच्या पुतळ्याचे व संविधानाची विटंबना होत आहे. महापुरुषांच्या पुतळ्याची विटंबना करण्याचा हेतू हा राजकीय भाग असल्याचे आंबेडकरी समाजाला जाणवत असल्याचे स्पष्ट करण्यात आले आहे.
काही दिवसांपूर्वी परभणीत सुद्धा बाबासाहेबांच्या पुतळ्याजवळ असलेल्या संविधानाच्या प्रतिकृतीची विटंबना करण्यात आली. त्या ठिकाणी सुद्धा मोठी दंगल झाली. त्यामध्ये सोमनाथ सूर्यवंशी याचा बळी गेला, अद्यापि त्याच्या कुटुंबीयांना न्याय मिळालेला नाही. वारंवार बाबासाहेबांच्या पुतळ्याची व संविधानाच्या विटंबनेच्या मागील मास्टरमाइंड शोधण्याची गरज असल्याचे निवेदनात म्हंटले आहे.
अमृतसर येथे घडलेला प्रकार अत्यंत निंदनीय आहे. बाबासाहेब एका जाती धर्माचे नसून, सर्व धर्मीयांचे व समाजाचे आहे. संविधान देशातील सर्व समाजासाठी आहे. त्यांच्या पुतळ्याची विटंबना होत असताना कोणताच राजकीय पुढारी पुढे येऊन निषेध नोंदवत नाही, तर ज्या समाजाला त्यांच्यामुळे आरक्षण मिळाले ते समाज देखील गप्प आहेत. इतर देशांमध्ये डॉ. बाबासाहेब आंबेडकर यांचे पुतळे उभारले जातात, मात्र आपल्या देशातील त्यांचे पुतळे असुरक्षित आहेत. स्वातंत्र्याच्या 76 वर्षानंतर देखील जातीयता संपलेली नसल्याची भावना आंबेडकरी समाजाच्या वतीने व्यक्त करण्यात आली आहे.
राष्ट्रपतींनी सदर घटनेच्या चौकशीसाठी कमिटी नेमून अमृतसर व परभणी येथील घटनेच्या मागे कोण मास्टर मार्इंड आहे? याचा तपास करावा, महापुरुषांच्या पुतळ्याचे विटंबन करणाऱ्यास मरेपर्यंत जन्मठेपची शिक्षा देण्याची मागणी आंबेडकरी समाजाच्या वतीने करण्यात आली आहे. 
मा. संपादक कृपया प्रसिध्दीसाठी.......................

कुरखेडा : तालूक्यातीलशिरपूर येथील ओमप्रकाश तूळशीराम सहारे यांच्या शेतशिवारातून विद्युत पंप चोरणाऱ्या आरोपींना कुरखेडा पोलिसांनी जेरबंद केले आहे. विलास सहारे (४१) रा. शिरपूर, विनोद पोवळे (३५) रा.भगवानपूर अशी आरोपींची नावे आहेत.

गावातीलच एका इसमाने सदर पंप पळवून नेत नजीकच्या गावातील एका इसमाच्या मदतीने विकण्याचा तयारीत असल्याची कूणकूण पोलीस व गावकऱ्यांना लागली होती. ही बाब लक्षात घेत पोलिसांच्या मार्गदर्शनात शिरपूरचे पोलीस पाटील विश्वनाथ रामटेके यानी पंप विकत घेण्याची बतावणी केली व आरोपी सोबत खोटा ग्राहक बनून चर्चा सूरू केली. नजीकच्या भगवानपूर या गावात दडवून ठेवण्यात आलेला पंप विकण्याचा उद्देशाने शनिवार रोजी गावी एका शेतात आणताच शेतातच दडून असलेले गावकरी व फीर्यादीने धाव घेत दोन्ही आरोपींना चोरीच्या मोटारपंपा सहीत रंगेहाथ पकडले व पोलिसांना सुचना केली. पोलिसांनी दोन्ही आरोपींना अटक केली असून प्रकरणाचा पूढील तपास ठाणेदार महेन्द्र वाघ यांच्या मार्गदर्शनात साहायक पोलीस उपनिरीक्षक कूसन हलामी करीत आहेत.

धानोरा : जेवणकरून घरूननिघालेल्या बाजारासाठी दुचाकीनेआठवडी मोतीरामचा मृतदेह दुसऱ्या दिवशी भर जंगलात मिळाला. त्याची हत्या करण्यात आल्याची नोंद पोलिसांनी केली आहे.

मोतीराम सोनू पदा (४५) रा. पदाबोरिया असे मृताचे नाव आहे. मोतीराम हा पदा बोरिया ग्रामसभेचा अध्यक्ष होता. २६ जानेवारी रोजी तो गावापासून पाच किमी अंतरावरील गोडलवाही येथे सीजी १९ बीयू १८४५ या क्रमांकाच्या दुचाकीने आठवडी बाजारासाठी गेला होता. मात्र सायंकाळ होऊनही परतला नाही. त्याला कधी कधी दारू पिण्याची सवय होती. तो दारू पिऊन शेतात झोपला असावा म्हणून शेतात शोध घेतला, मात्र तो आढळून आला नाही. २७ जानेवारी रोजी त्याचा मृतदेह गोडलवाही मार्गाच्या बाजूला जंगलात आढळून आला. त्याच्या शरीरावर काठीचे मार होते. दुचाकी अद्याप गायब आहे. अज्ञात आरोपीवर खुनाचा गुन्हा नोंद आहे. पश्चात पत्नी, तीन मुले, दोन मुली असा परिवार आहे.

आरमोरी, (ता.प्र). 1 एप्रिल 1993 पासून गडचिरोली जिल्ह्याची दारूबंदी करण्यात आली. मात्र ही दारूबंदी कायद्याने जरी बंद असली तरी लगतच्या चंद्रपूर जिल्ह्यातून अवैधरित्या दारू आणून तसेच शेतशिवारात, जंगलात मोहफुलाची दारू काढून काही लोकांमार्फत दारूचा व्यवसाय सुरू आहे. दारु विक्रेत्यांच्या मुजोरीने सर्वसामान्य नागरिक त्रस्त झाले आहेत. या विरोधात आता स्थानिक जनता रस्त्यावर उतरली असून सोमवारी (दि.27) रात्री 9 वाजताच्या सुमारास आरमोरी येथील टिळक चौकातील नागरिकांनी दुर्गा मंदिर चौकात एकत्र येऊन दारू विक्रेत्यांवर कठोर कारवाईच्या मागणीसाठी रस्त्यावर उतरून 'आक्रोश'

आस्मा केला शहरात दारू विक्रेत्यांची वाढलेली भाईगिरी हे आता नागरिकांच्या डोक्याच्या पार झाली आहे. त्याचा रोष आता स्थानिक नागरिकांकडून व्यक्त केला जात आहे. मुख्यतः दारू विक्रेत्यांची बोलीभाषा व अरेरावी ही आता स्थानिकांसाठी मोठी अडचण होत आहे. त्यातच तरूण मोठ्या प्रमाणात दारुच्याआहारी गेल्याने आता पालकांमध्येही रोष व्यक्त होत आहे. आरमोरी शहरातील दारू विक्रेत्यांवर पोलिस प्रशासनाने कडककारवाई करून शहरातील दारू विक्रेत्यांचा अवैध व्यवसाय संपुष्टात आणावा, अशी मागणी नागरिकांनी केली आहे.

माहिती द्या, तत्काळ कारवाई : ठाणेदार गवते

आरमोरी येथील टिळक चौकात जनता दारू व्यवसायिकांच्या विरोधात रस्त्यावर उतरल्याने राकाँचे कार्यकर्ते संदीप ठाकूर यांनी पोलिस निरीक्षक कैलास गवते यांना बोलावले. आरमोरी शहरात सुरू असलेल्या अवैध व्यवसायांना संपुष्टात आणण्यासाठी आम्हाला आपल्या मदतीची गरज आहे. आपल्या वॉर्डात विक्रेते दारू विक्री करत असताना आम्हाला फोन करा, आम्ही ताबडतोब येऊन त्या विक्रेत्याविरोधात कठोर कारवाई करू, असे आश्वासन पोनि गवते यांनी दिले. त्यासाठी त्यांनी आपला व आपल्या कर्मचाऱ्यांचा मोबाइल नंबर देऊन दारू विक्रेत्यांची माहिती द्या, असे आवाहन केले.

दारुसह इतरही अवैध व्यवसायावर कारवाई करा

आरमोरी शहरातील टिळक चौक, दुर्गा मंदिर परिसरात एकत्र आलेल्या नागरिकांनी पोलिस निरीक्षक कैलास गवते यांना आरमोरी शहरात सुरू असलेल्या दारू व्यवसायासोबतच सर्रास सुरू असलेली सट्टापट्टी, सुगंधी तंबाखूचा व्यवसाय सुद्धा बंद करून कठोर कारवाई करण्याची मागणी केली. शहरात अवैध व्यवसायांना उत आला आहे. याची दखल ठाणेदार गवते यांनी घ्यावी, अशी मागणी नागरिकांनी केली.

गडचिरोली:- महाराष्ट्र राज्य अँथलेटिक संघटनेद्वारे आयोजित वार्षिक सबज्युनिअर क्रीडा स्पर्धेचे आयोजन पंढरपूर येथे केलेले आहे सदर स्पर्धेत सहभागी होण्याकरिता गडचिरोली जिल्ह्यातील संघाची निवड चाचणी २ फेब्रुवारी २०२५ रविवार ला सकाळी ७:०० वाजता पासून एम.आय.डी.सी. ग्राउंड कोटगल रोड ,गडचिरोली येथे आयोजित केलेली आहे सदर स्पर्धेत वय वर्ष ८,१०,१२,१४ वर्षा आतील मुले व मुली सहभागी होऊ शकतात खेळाडूंकरिता विविध वयोगटात ५० मिटर,६०मिटर,८० मिटर,३००मिटर धावणे, लांबउडी, गोळाफेक स्पर्धेत सहभागी होऊ शकतात सदर स्पर्धेत प्राविण्य प्राप्त खेळाडूंना राज्यस्तरीय स्पर्धेत सहभाग होण्याची संधी मिळणार आहे तरी या स्पर्धेत जास्त संख्येने विद्यार्थ्यांना सहभाग घेण्याचे आवाहन गडचिरोली जिल्हा अँथलेटिक्स संघटनेचे सचिव आशिष नंदनवार सर यांनी केलेले आहे .

30 जानेवारी रोजी खासदार ॲड. चंद्रशेखर आझाद यांचे चिमूरमध्ये स्वागत - आझाद संघरामगिरीत संबोधित करणार

 चंद्रपूर - चिमूर तहसीलच्या संघरामगिरी येथे आयोजित बौद्ध धम्म परिषदेअंतर्गत आयोजित महापरित्राण पथात आझाद समाज पक्षाचे (भारत एकता मिशन) राष्ट्रीय अध्यक्ष खा. चंद्रशेखर आझाद उपस्थित राहणार आहेत. बौद्ध धम्माच्या अनुयायांसाठी दरवर्षी 30 आणि 31 जानेवारी रोजी संघराम गिरी (रामदेगी) येथे धम्म संमेलन आयोजित केले जाते. यामध्ये हजारो भाविक सहभागी होऊन धम्मदेसनाचा लाभ घेतात. या काळात महापरित्राण पथाचेही आयोजन केले जाते. या परिषदेला संबोधित करण्यासाठी आझाद समाज पक्षाचे (भारत एकता मिशन) राष्ट्रीय अध्यक्ष खा. चंद्रशेखर आझाद यांची नियुक्ती करण्यात आली.

नुकत्याच झालेल्या विधानसभा निवडणुकीत आझाद समाज पक्षाने अमित भीमटे यांच्या रूपाने आपला उमेदवार उभा केला होता. त्यांना मतदानात चौथा क्रमांक मिळाला. आझाद चिमूर मतदारांचे कृतज्ञता व धम्मदेसना स्वीकारून तथागत बुद्धांना नमन करण्यासाठी येत आहेत. त्यांच्या स्वागतासाठी चिमूर शहरात जोरदार तयारी करण्यात आली आहे. चिमूर शहरातील हजारे पेट्रोल पंप चौकात आयोजित स्वागत कार्यक्रमात पक्षाचे कार्यकर्ते व आंबेडकरी मिशनरी मोठ्या संख्येने उपस्थित राहणार आहेत, अशी माहिती आझाद समाज पक्षाचे तालुकाध्यक्ष अमित भीमटे यांनी दिली अशी माहिती प्रदेशाध्यक्ष मनीष साठे यांनी प्रसिद्धीस दिलेल्या पत्रकात दिली आहे.

गडचिरोली जिल्ह्यातील शिवसेना (उबाठा)पदाधिकाऱ्यांची नियुक्ती जाहीर

मुंबई, दि. २८ (प्रतिनिधी)- शिवसेना पक्षप्रमुख उद्धव ठाकरे यांच्या आदेशाने गडचिरोली जिल्ह्यातील पदाधिकाऱ्यांच्या नियुक्त्या जाहीर करण्यात आल्या आहेत, अशी माहिती शिवसेना मध्यवर्ती कार्यालयातून प्रसिद्धीस देण्यात आलेल्या पत्रकाद्वारे कळविण्यात आली आहे.

वासुदेव शेडमाके जिल्हाप्रमुख , रामकृष्ण मडावी जिल्हा समन्वयक, विजय पवार सहसंपर्कप्रमुख , राजू अंबानी जिल्हा संघटक, अरविंद कात्रटवार उपजिल्हाप्रमुख , घनशाम कोलते (तालुकाप्रमुख - गडचिरोली ), कुणाल कोवे (तालुकाप्रमुख - गडचिरोली ग्रामीण), अब्दुल शेख (शहरप्रमुख - गडचिरोली शहर), कृष्णा वाघाडे (उपशहरप्रमुख - गडचिरोली शहर), ज्ञानेश्वर वाघमारे (तालुका संघटक-गडचिरोली तालुका), गजानन नैताम (तालुका समन्वयक - गडचिरोली तालुका), मनोज पोरटे (तालुकाप्रमुख - चामोर्शी शहर), दीपक दुधबावरे (तालुकाप्रमुख - चामोर्शी ग्रामीण), बंडू नैताम (शहरप्रमुख- चामोर्शी शहर), अंकिम साबनवार (तालुका संघटक- चामोर्शी तालुका), सुभाष करणे (तालुका समन्वयक- चामोर्शी तालुका), दिलीप सुरपाम (उपजिल्हाप्रमुख - अहेरी विधानसभा), प्रफुल्ल येरने (तालुकाप्रमुख- अहेरी विधानसभा), टिल्लू मुखर्जी (तालुकाप्रमुख मुलचेरा तालुका), अक्षय पुंगाटी (तालुकाप्रमुख-इटापल्ली तालुका), राजेंद्र लानजेकर (सल्लागार-गडचिरोली जिल्हा). आदि पदाधिकाऱ्यांची नियुक्ती जाहीर करण्यात आली आहे 

पालकमंत्री दोन तरीही जिल्हा नियोजन ची बैठक ऑनलाईन का? काँग्रेस जिल्हाध्यक्ष महेंद्र ब्राह्मणवाडे यांचा सवाल

गडचिरोली :: कधी नव्हे तर जिल्ह्याच्या इतिहासात राज्याच्या मुख्यमंत्र्यांनी जिल्ह्याचे पालकमंत्री पद स्वतः कडे ठेवून नवा इतिहास रचला, मात्र या सोबतच जिल्ह्यातील सर्वसामान्य नागरिकांच्या अपेक्षांच्या भुवया उंचावल्या, जिल्ह्याच्या विकासाला गती मिळेल, राज्याचे मुख्यमंत्री सर्वसामान्य नागरिकांच्या भावना समजून घेतील येथील नागरिकांशी संवाद साधतील अशी आशा जिल्ह्यातील नागरिकांमध्ये निर्माण झाली इतकेच नाही तर मुख्यमंत्र्यांना मदत म्हूणन जिल्ह्याला सह पालकमंत्री सुद्धा देण्यात आले, मात्र विधानसभा निवडणूकी नंत्तर गडचिरोली जिल्हा नियोजन समितीची पहिलीच बैठक 31 जानेवारी रोजी, सहपालकमंत्री यांच्या अध्यक्षतेखाली व्हिडीओ कॉन्फरेन्स च्या माध्यमातुन पार पडणार असून, जिल्ह्याला ऐक नव्हे तर दोन - दोन पालकमंत्री असताना देखील नियोजन समितीची बैठक ऑनलाईन का असा सवाल गडचिरोली जिल्हा काँग्रेस कमटी चे अध्यक्ष महेंद्र ब्राह्मणवाडे यांनी उपस्थित केला आहे.  इतकेच नाही तर बैठक ऑनलाईन असतांना देखील मुख्यमंत्री फडणवीस हे बैठीकस राहु शकत नाही हे देखील मोठी शोकांतिका असून, मुख्यमंत्री देवेंद्र फडणवीसांनी फक्त लोकप्रियता मिळवण्यासाठीच गडचिरोली जिल्ह्याचे पालकत्व स्वीकारले का?  कीं फक्त आपल्या उद्योगपती मित्रांना फायदा करून, देण्यासाठी पालकमंत्री पद स्वतः कडे ठेवले असाही प्रश्न महेंद्र ब्राह्मणवाडे यांनी उपस्थित केला आहे. जिल्ह्यातील असंख्य नागरिक विविध समस्यांना घेऊन मुख्यमंत्र्याची भेट घेण्यासाठी आतुरतेने वाट पाहत आहे, अनेक शेतकऱ्याचे धानाचे चुकारे अजून मिळाले नाही, घरकुल धारकांच्या अनेक समस्या आहेत, जिल्ह्यातील रानटी जनावरांचे बंदोबस्त संदर्भातील समस्या आहेत, जिल्ह्यातील रस्ते, दवाखाने सारख्या विविध विकास कामांना प्रशासकीय मंजुरी झालेली असताना देखील निधी उपलब्ध झालेला नाही, त्यामुळे अनेक कंत्राट दारावर उपास मारीची वेळ आलेली आहे असे अनेक समस्या असताना देखील राज्याचे मुख्यमंत्री आणि जिल्ह्याचे पालकमंत्री देवेंद्र फडणवीस जिल्ह्यासाठी वेळ देत नसतील तर जिल्ह्यातील नागरिकांना पाकमंत्री हटाओ गडचिरोली जिल्हा बचाओ अशी मोहीम राबविण्याची वेळ येईल का असेही मत महेंद्र ब्राह्मणवाडे यांनी व्यक्त केले.

शिवसेना (उबाठा) पक्षाचे वतीने जिल्हाप्रमुख वासुदेव शेडमाके, सह संपर्क प्रमुख विजय शृंगारपवार यांच्या नेतृत्वाखाली बस तिकीट दरवाढीचा निषेध व चक्का जाम

गडचिरोली:-

  आज दिनांक 29/01/2025 ला शिवसेना (उबाठा) पक्षाचे वतीने जिल्हा प्रमुख वासुदेव शेडमाके यांच्या नेतृत्वाखाली विजय  श्रुंगारपवार सह संपर्क प्रमुख गडचिरोली जिल्ह्या यांच्या उपस्थितीत स्थानिक बस स्थानक गडचिरोली येथे धरणे आंदोलन करण्यात आले. नुकताच राज्य शासनाने बस तिकिट दरवाढीचा निर्णय घेतला. त्या निर्णयाच्या विरोधात शिवसेना पक्षातर्फे गडचिरोली बसस्थानक येथे धरणे आंदोलन करण्यात आले. लाडकी बहिण योजना अंमलात आणल्या पासून राज्यात जिवनावशक वस्तूंची कमालीची दरवाढ राज्यातील सत्ताधाऱ्यांनी सपाटाच लावला असुन याचाच एक भाग बस तिकीट दर वाढ निर्णय घेतला असून या निर्णया विरोधात शिवसेना उद्धव बाळासाहेब ठाकरे पक्षातर्फे गडचिरोली बसस्थानक येथे धरणे आंदोलन करण्यात आले.या प्रसंगी नंदुभाऊ कुमरे, सुनील पोरेड्डिवार, राजेंद्र लांजेकर, किरण शेडमाके, पवन गेडाम, संदिप वाघरे, गोविंदा बाबनवाडे, प्रशिक झाडे, हिंमत भुरसे, रामगिरवार , विजय पत्तीवार.आणि बहुसंख्येने शिवसैनिक उपस्थित होते.

गुराख्याचा वाघाने पाडला फडशा, दुसऱ्या दिवशी मिळाले अवयव 

चंद्रपूर:-
चंद्रपूर जिल्ह्यातील मूल तालुक्यातील बंडू कोल्हे वय ५५ वर्ष रा. रामपुरी हा इसम बकऱ्या गुरं चारण्या साठी चिचोली च्या जंगलात नेहमी प्रमाणे गेला असता अंदाजे ४. ००वाजताच्या सुमारास वाघाने हल्ला केला असावा अशी शंका आहे.. वनविभागाने गावकऱ्यांच्या  मदतीने  शोध मोहीम चालवली होती. रात्री ९.०० वाजे पर्यंत इसम मिळाला नव्हता. अंधार पडल्यामुळे शोध मोहीम थांबविण्यात आली होती,ती सकाळी पुन्हा सुरू करुन शोध घेतला जाणार होता.

आज सकाळी वन विभागाच्या पथकाने पुन्हा शोध मोहीम सुरू केली त्यात काटवण येथील कक्ष क्रमांक ७५६ काटवण नियत क्षेत्रात मृतदेहाचे काही अवयव आढळले त्यापैकी काही उर्वरित अवशेष रुग्णालयात आणण्यात आले यावेळी चंद्रपूर येथील वन उपसंचालक बफर जगताप मॅडम, वनपरिक्षेत्र अधिकारी कारेकर, क्षेत्रपाल वरगंटीवार, वनरक्षक भास्कर परचाके उपस्थित होते.मृतकाच्या कुटुंबीयांना तात्काळ २०,००० रुपये मदत देण्यात आली. या घटनेमुळे गावात भीतीचे वातावरण निर्माण झाले आहे.

या भागात  वाघ बिबट्या यांचा वावर असून सतत वाघाचे हल्ले  होत असतात त्यामुळे वन विभागाने यावर तात्काळ कार्यवाही करावी अशी जनतेची मागणी आहे.  वन विभागाचे याकडे विशेष लक्ष नाही त्यामुळे  गावात नागरिकांमध्ये अत्यंत घबराटीचे वातावरण असून वन विभागाच्या कार्यप्रणाली वर शंका निर्माण झाली असून शासनाच्या विरोधात जनता रोष व्यक्त करीत आहे. वाघाचे हल्ले वाढतच असून मानवाचे प्रिआण जातच आहेत.

उत्तर प्रदेश: प्रयागराजमध्ये कुंभमेळ्यात चेंगराचेंगरीची घटना घडली आहे. प्रयागराजमध्ये सुरु असलेल्या महाकुंभमेळ्यात मध्यरात्री चेंगराचेंगरी झाली. अमृत स्नानाच्या मौनी अमावस्येच्या आधी ही चेंगराचेंगरी झाल्याची माहिती मिळत आहे.

या घटनेची माहिती मिळताच रुग्णवाहिका दाखल झाल्या असून जखमींना बाहेर काढण्याचं काम सुरु आहे. यामध्ये अनेकजण जखमी झाले असून जखमींवर रुग्णालयात उपचार सुरु आहेत. तसेच या घटनेमध्ये 30 हून अधिक जणांचा मृत्यू झाल्याची माहिती मिळत आहे.

नेमकं काय घडलं?

मध्यरात्री 1 वाजताच्या सुमारास संगम किनाऱ्यावर मौनी अमावस्येच्यानिमित्ताने मोठ्या प्रमाणात गर्दी झाली होती. या गर्दीमुळे संगम किनाऱ्यावर चेंगराचेंगरीची घटना घडली. रात्री 2 वाजता गर्दी नियंत्रणात ठेवण्यासाठी लावण्यात आलेले बॅरेकेडींग तुटले आणि चेंगराचेंगरीची घटना घडल्याची माहिती समोर आली आहे. या घटनेमध्ये अनेकजण जखमी झाले. तसेच 30 पेक्षा अधिक भाविकांचा मृत्यू झाल्याची शक्यता वर्तवण्यात येत आहे. या घटनेनंतर जखमींना रुग्णालयात उपचारासाठी दाखल करण्यात आले आहे.

गडचिरोली, 29 जानेवारी :– शासनाच्या विविध कृषीसंलग्न योजनांचा लाभ पात्र शेतकऱ्यांपर्यंत जलदगतीने व अधिक प्रभावीपणे पोहोचवण्यासाठी अॅग्रिस्टॅक योजनेंतर्गत शेतकऱ्यांना शेतकरी ओळख क्रमांक दिला जात आहे. जिल्ह्यातील जास्तीत जास्त शेतकऱ्यांनी लवकरात लवकर नजीकच्या नागरी सुविधा केंद्रावर (सिएससी सेंटर) नोंदणी करून शेतकरी ओळख क्रमांक प्राप्त करण्याचे आवाहन जिल्हाधिकारी अविश्यांत पंडा यांनी केले आहे.
  गडचिरोली जिल्ह्यात 20 जानेवारीपासून ‘अॅग्रिस्टॅक’ (Agristack) डिजिटल पब्लिक इन्फ्रास्ट्रक्चर योजनेची अंमलबजावणी सुरू झाली आहे. या योजनेद्वारे शेतकरी माहिती संच तयार करून प्रत्येक शेतकऱ्याला शेतकरी ओळख क्रमांक (फार्मर आयडी) दिला जाणार आहे. जिल्ह्यात एक लाख ७८ हजार शेतकऱ्यांपैकी सुमारे १४ हजार ५०० शेतकऱ्यांनी नोंदणी करून फार्मर आयडी (शेतकरी ओळख क्रमांक) व प्रमाणपत्र प्राप्त केले आहे.

*फार्मर आयडी (शेतकरी ओळख क्रमांक) का आवश्यक आहे?*
अॅग्रिस्टॅक योजनेत नोंदणी केल्याने शेतकऱ्यांना पीक विमा, पीक कर्ज, पीएम किसान सन्मान निधी आणि विविध सरकारी अनुदान योजनांचा लाभ सहज मिळू शकतो. या आयडीच्या मदतीने शेतकऱ्यांना वारंवार प्रमाणिकरण (C-KYC) करण्याची गरज राहणार नाही.

*फार्मर आयडीसाठी आवश्यक कागदपत्रे:*
आधार कार्ड, आधारशी व बँक खात्याशी लिंक असलेला मोबाईल क्रमांक,  सातबारा उतारा किंवा नमुना 8

*नोंदणी प्रक्रिया:*
शेतकऱ्यांनी वरील आवश्यक कागदपत्रांसह जवळच्या नागरी सुविधा केंद्र (CSC) येथे जाऊन नोंदणी करावी.

गडचिरोली, 29 जानेवारी :– शासनाच्या विविध कृषीसंलग्न योजनांचा लाभ पात्र शेतकऱ्यांपर्यंत जलदगतीने व अधिक प्रभावीपणे पोहोचवण्यासाठी अॅग्रिस्टॅक योजनेंतर्गत शेतकऱ्यांना शेतकरी ओळख क्रमांक दिला जात आहे. जिल्ह्यातील जास्तीत जास्त शेतकऱ्यांनी लवकरात लवकर नजीकच्या नागरी सुविधा केंद्रावर (सिएससी सेंटर) नोंदणी करून शेतकरी ओळख क्रमांक प्राप्त करण्याचे आवाहन जिल्हाधिकारी अविश्यांत पंडा यांनी केले आहे.

  गडचिरोली जिल्ह्यात 20 जानेवारीपासून ‘अॅग्रिस्टॅक’ (Agristack) डिजिटल पब्लिक इन्फ्रास्ट्रक्चर योजनेची अंमलबजावणी सुरू झाली आहे. या योजनेद्वारे शेतकरी माहिती संच तयार करून प्रत्येक शेतकऱ्याला शेतकरी ओळख क्रमांक (फार्मर आयडी) दिला जाणार आहे. जिल्ह्यात एक लाख ७८ हजार शेतकऱ्यांपैकी सुमारे १४ हजार ५०० शेतकऱ्यांनी नोंदणी करून फार्मर आयडी (शेतकरी ओळख क्रमांक) व प्रमाणपत्र प्राप्त केले आहे.

फार्मर आयडी (शेतकरी ओळख क्रमांक) का आवश्यक आहे?

अॅग्रिस्टॅक योजनेत नोंदणी केल्याने शेतकऱ्यांना पीक विमा, पीक कर्ज, पीएम किसान सन्मान निधी आणि विविध सरकारी अनुदान योजनांचा लाभ सहज मिळू शकतो. या आयडीच्या मदतीने शेतकऱ्यांना वारंवार प्रमाणिकरण (C-KYC) करण्याची गरज राहणार नाही.

फार्मर आयडीसाठी आवश्यक कागदपत्रे:

आधार कार्ड, आधारशी व बँक खात्याशी लिंक असलेला मोबाईल क्रमांक, सातबारा उतारा किंवा नमुना 8

नोंदणी प्रक्रिया:

शेतकऱ्यांनी वरील आवश्यक कागदपत्रांसह जवळच्या नागरी सुविधा केंद्र (CSC) येथे जाऊन नोंदणी करावी.

गडचिरोली:नवेगाव वसतिगृहात आजाद समाज पार्टीची धडक दिली असता पिण्याच्या पाण्याची tank मध्ये दुर्गंधी येत असून मोठ्या प्रमाणात शेवाळ आढळून आले. कित्येक दिवसापासून टॅंक साफ करण्यात आली नव्हती तसेच वॉटर फिल्टर बंद अवस्थेत असल्याने तेच पाणी मुलांना प्यावे लागते.

 जिल्ह्यातील अनेक वसतिगृह प्रक्रियेत कर्मचारी भ्रष्टाचार होत असल्याच्या तक्रारी विद्यार्थ्यांकडून आल्याने आजाद समाज पार्टीच्या वतीने गडचिरोली येथील नवेगाव स्थित समाजकल्याण मुलांचे वसतिगृहात स्टिंग ऑपेरेशन करण्यात आला. त्यामध्ये विद्यार्थी प्रवेश प्रक्रियेत मोठ्या प्रमाणात पैसे घेण्यात आले, तसेच वसतिगृह प्रवेशासाठी मुलांचे अर्ज प्राप्त झाल्यानंतर निवड यादी जाहीर करणे आवश्यक असताना ती जाहीर न करता विद्यार्थ्यांनी विचारले असता विद्यार्थ्यांना तुमचा नंबर लागला नाही अस सांगून नंबर लावायचं असल्यास पैशाची मागणी करण्यात आली, असा दावा आजाद समाज पार्टी चे जिल्हाध्यक्ष राज बन्सोड व विनोद मडावी यांनी केला. 

हा प्रकार मुलांच्या शिक्षण हक्काशी खेळ करणारा अत्यंत निंदनीय आहे. मागासवर्गीय मुलामुलींची शिक्षणाची सोय व्हावी, त्यांना उच्च शिक्षण घेता यावे त्याचप्रमाणे आर्थिक दृष्ट्या दुर्बल घटकातील मुलीना विद्यालयीन व महाविद्यालयीन शिक्षण घेता यावे, यासाठी शासकीय वसतिगृहे सुरु करण्यात आलेली आहेत. परंतु या ठिकाणी योजना राबविणारेच रक्षक हे भक्षक बनल्याचा आरोप आजाद समाज पार्टीच्या वतीने करण्यात आला असून संबंधित गृहपाल महेश गाडवे व सहभागी कर्मचारी यांना बडतर्फ करण्याची मागणी आजाद समाज पार्टी ने सहाय्यक आयुक्ताकडे केली.

वसतिगृह प्रवेशाकरिता दुसरा पर्याय नसल्या कारणाने पर्यायाने अनेक मुलांनी कॅश स्वरुपात व ऑनलाईन पद्धतीने प्रवेशासाठी वॉर्डन महेश गावडे यांच्या अकॉउंट ला पैसे टाकले असल्याची पुराव्यानिशी माहिती आमच्याकडे असून अनेक विद्यार्थी भीती पोटी ही गोष्ट बाहेर सांगायला घाबरत आहेत. विद्यार्थ्यांनी जर आवाज उठविला तर प्रवेश रद्द करू अशी धमकी त्यांना दिली असल्याने विद्यार्थी गप्प आहेत. या संदर्भात संबंधित कर्मचाऱ्याचे Bank statement, व phone pay details चेक करण्यात यावे. असेही निवेदनात मागणी केल्या गेली.

गोर गरीब, शेतकरी कामगारांचे मुले शिकली पाहिजेत, पैशा अभावी शिक्षण थांबू नये या उद्देशाने शासन अशी योजना राबवित असतो पण आपले कर्मचारी पगारी असून प्रवेशासाठी गोर गरीब मुलांकडून पैसे वसूल करून मुलांचे आर्थिक शोषण करीत असल्याचा हा धक्कादायक प्रकार आहे. 

यामध्ये कुठल्याही प्रकारची गय न करता तात्काळ अशा प्रकारच्या भ्रष्टाचार करणाऱ्या महेश गाढवे व त्यांच्यासोबत सहभागी कर्मचाऱ्यांना नौकरीतून बडतर्फ करण्यात यावे अशी सक्त मागणी आजाद समाज पार्टी च्या वतीने करण्यात आली.. तात्काळ कारवाई न झाल्यास या विरोधात समाजकल्याण कार्यालयाला टाळे ठोकण्यात येईल असा इशारा देण्यात येत आहे.

यावेळी आजाद समाज पार्टी जिल्हाध्यक्ष राज बन्सोड, जिल्हा कार्याध्यक्ष विनोद मडावी, जिल्हा कोषाध्यक्ष नागसेन खोब्रागडे, जिल्हा महासचिव पुरुषोत्तम रामटेके, विधानसभा प्रभारी धनराज दामले, मिडिया प्रभारी सतीश दुर्गमवार उपस्थित होते 

--------------------

पुढील 3 महिन्यात जिल्ह्यातील सर्व हॉस्टेल च्या स्वच्छतेचे काम व पाणी टॅंक तथा पेंटिंग होणार असून भ्रष्टाचार करणाऱ्या कर्मचाऱ्यावर तातडीने कारवाई करू असे आश्वासन दिले.

-------------------

राज बन्सोड 

जिल्हाध्यक्ष, आजाद समाज पार्टी 

गडचिरोली 

8806757873

रेल्वे लाईन च्या कामास साखरा ग्रामस्थांनी रोखले तरीही प्रशासशाचे दुर्लक्ष 

गडचिरोली:

गडचिरोली जिल्ह्याला विकासाचे द्वार बनविणार अशी भूलथापा देणाऱ्या राज्यसरकार ने तथा सरकारी अधिकाऱ्यांनी, साखरा गावातील काही ग्रामवासियांनी रेल्वेचे काम थांबविण्याच्या घटने कडे चार महिन्यांपासून मुद्दाम दुर्लक्ष केल्याची लाजिरवाणी बाब उघडकीस आली आहे.

या घटनेची सविस्तर माहिती घेतली असता साखरा येथील गावकऱ्यांनी तत्कालीन अधिकाऱ्यांशी वाटाघाटी करून ठरलेल्या दरा प्रमाणे आपल्या जमिनीचे विक्री पत्र रेल्वे प्रशासनाला करून दिले होते.
त्या जागेचे विक्री पत्र झाल्यावर संबंधित जागेचे फेरफार होऊन ती जागा आज रेल्वे प्रशासनाच्या नावाने नोंद करण्यात आलेली आहे,तरी सुध्दा अशा प्रकारे गावकरी रेल्वेचे काम थांबविण्याचा प्रयत्न करतात आणि त्याला प्रशासन दुर्लक्ष केल्याने जिल्ह्यातील लाखो लोकांमध्ये आक्रोश व्यक्त केला जात आहे.

एकीकडे राज्याचा पहिला जिल्हा आहे म्हणून बोलायचे आणि दुसरीकडे रेल्वेच्याच कामाकडे दुर्लक्ष करणे, अशी प्रशासनाची ही भूमिका आता संशयित वाटू लागली आहे.
या बद्दल रेल्वेच्या अधिकाऱ्यांना विचारल्यानंतर त्यांनी सांगितले की साखरा गावातील लोकांनी रेल्वेचे काम थांबविल्याची माहिती, गडचिरोली चे जिल्हाधिकारी,पोलिस अधिक्षक, उपविभागीय अधिकारी तथा भू संपादन अधिकारी यांना तीन वेळा लिखित पत्र देण्यात आले आहे,पण कोणत्याही शासकीय यंत्रणेने होणाऱ्या कामाला सुरक्षा पुरविली नाही अशी धक्कादायक बाब आमच्या प्रतिनिधी कडे सांगितली .

सदर चे काम थांबविल्या ची माहिती माजी खासदार अशोक नेते यांना सांगितली असता, त्यांनी सुध्दा प्रशासनाच्या भूमिकेवर आश्चर्य व्यक्त करून रेल्वे कामांची पाहणी करून जिल्हाधिकाऱ्यांना ताबडतोब याची दखल घेण्याची सूचना केली

लिटील हर्टस विद्यालयात फॅन्सी ड्रेस स्पर्धा संपन्न

विज्येत्या विद्यार्थ्यांना पारितोषिक व प्रमाणपत्राचे वितरण

आष्टी :- चामोर्शी तालुक्यातील आष्टी येथील लिटील हर्टस इंग्लिश मिडीयम हायस्कूल आष्टी येथे तीन दिवसीय (दि. २८ ते ३० जाने.) वार्षिक स्नेहसंमेलन समारोहाचे आयोजन करण्यात आले असून प्रथम दिवशी फॅन्सी ड्रेस स्पर्धा आयोजित करण्यात आली असून संस्थेचे अध्यक्ष अनिल आल्लूरवार, सचिव  रमेश आरे यांच्या शुभहस्ते स्पर्धेचे उद्घाटन करण्यात आले.
विद्यार्थी शालेय जीवनात घडतो त्यांच्या आत असलेले सुप्तगुण प्रदर्शित करण्याची त्यांना प्राप्त व्हावी व विद्यार्थ्यांच्या कला गुणांना वाव मिळावा या हेतूने विद्यालयात वार्षिक स्नेहसंमेलनाचे आयोजन करण्यात आले. सदर स्पर्धेत इयत्ता नर्सरी ते दहावीतील पूर्व प्राथमिक, प्राथमिक, उच्च प्राथमिक व माध्यमिक अश्या चार गटात १५० विद्यार्थी या स्पर्धेत सहभागी झाले असून विद्यार्थ्यांनी विविध वेशभूषा साकारून प्रदर्शन केले. 
या स्पर्धेत विद्यार्थ्यांनी उत्कृष्ठ प्रदर्शन सादर करीत पूर्व प्राथमिक गटातून प्रथम मास्ट. द्विज अलोणे, द्वितीय कु. अगस्त्या आभारे, तृतीय कु. परी खामनकर, प्राथमिक गटात कु. तमना कडते, द्वितीय मास्ट. श्रीहीत आरे, तृतीय कु. वंशिका बामनकर, उच्च प्राथमिक गटात कु. लिजा हलदार, कु. अंजली वेलादी, तृतीय मास्ट. निवृत्ती नागरगोजे तर माध्यमिक गटात कु. अर्नवी रोहनकर, द्वितीय कु. तनवी मंडल, तृतीय मास्ट. आर्यन मुद्रिकवार अश्याप्रकारे क्रमांक पटकाविला विज्येत्या विद्यार्थ्यांना उपस्थित कार्यक्रमाला उपस्थित पाहुणे मंडळीच्या शुभहस्ते पारितोषिक व प्रमाणपत्र वितरीत करण्यात आले.
आयोजित कार्यक्रमाला साईराम बहुद्देशीय संस्थेचे अध्यक्ष  अनिल आल्लूरवार, सचिव  रमेश आरे, सदस्या भवानी आरे, सरिता गादे, मुध्याध्यापक  कृष्णमूर्थी गादे तसेच या स्पर्धेला पर्यवेक्षक म्हणून  रोशनी अवथरे,  सपना पांडे, सुहासिनी बोरकर तसेच विद्यालयातील सर्व शिक्षक, शिक्षकेत्तर कर्मचारी, विद्यार्थी व पालकवर्ग मोठ्या संख्येने उपस्थित राहून या कार्यक्रमची शोभा वाढविली.

ईल्लूर गावा जवळील वळणावर दुचाकींची समोरासमोर धडक, तिघेही जखमी 

आष्टी  (प्रतिनिधि) ## दोन दुचाकीची समोरासमोर धडक बसली यात दुचाकीवरील तिघे गंभीर जखमी झाल्याची घटना आज दुपारी दोन  वाजताच्या सुमारास ईल्लुर गावा जवळील वळणावर घडली .                                    जखमी युवकाचे नाव संदिप टेकूलवार , वय २७ ,  संतोष गोर्लावार , वय ३४ रा. दोघेही कुनघाडा (माल) व स्वप्निल मोहूर्ले, वय २८ , रा . दरुर असे आहे.     
   कुनघाडा येथून दुचाकीवर संदीप टेकुलवार , व संतोष गोर्लावार  हे दोघे आष्टीकडे येत असताना व आष्टी कडून  स्वप्नील मोहुर्ले हा इलुर कडे जात असताना इल्लूर येथील वळणावर दोन्ही दुचाकीची समोरासमोर धडक बसली. यात दुचाकीवरील तिघेही जण गंभीर जखमी झाले. या तिघांनाही आष्टी येथील ग्रामीण रुग्णालयात उपचारासाठी दाखल करण्यात आले. त्यातील संदिप टेकुलवार व संतोष गोर्लावार यांना गडचिरोली येथे रेफर करण्यात आले. पुढील तपास पोलीस निरीक्षक विशाल काळे यांच्या मार्गदर्शनाखाली आष्टी पोलीस करीत आहेत